އޮޑިޓަރ ޖެނެރަލްގެ އޮފީހުން އަންނަ އަހަރަށް ލަފާކޮށް ހުށަހެޅި 133 މިލިއަން ރުފިޔާގެ ބަޖެޓަށް އެއްވެސް އުނިއިތުރެއް ނުގެނެސް، ހުށަހެޅި ގޮތަށް ފާސްކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފިއެވެ.
އޮޑިޓް އޮފީހުން ކުރިއަށް އޮތް އަހަރުގެ ބަޖެޓު މަޖިލީހަށް ހުށަހެޅީ މިދިޔަ ހޯމަ ދުވަހުއެވެ. މާލިއްޔަތު ކޮމިޓީއަށް އެ އޮފީހުން ހުށަހެޅި ޖުމްލަ 133،590،265 (އެއްސަތޭކަ ތިރީސް ތިން މިލިއަން، ފަސްސަތޭކަ ނުވަދިހަ ހާސް، ދުއިސައްތަ ފަސްދޮޅަސް ފަސް) ރުފިޔާގެ ބަޖެޓުގެ ތަފްސީލަށް ބަލާއިރު:
- ރިކަރަންޓް ޚަރަދު: 85.8 މިލިއަން ރުފިޔާ
- ކެޕިޓަލް ޚަރަދު: 4.2 މިލިއަން ރުފިޔާ
- ޕީއެސްއައިޕީ މަޝްރޫޢުތަކަށް: 43.5 މިލިއަން ރުފިޔާ
ކޮމިޓީގައި ވާހަކަދައްކަވަމުން އޮޑިޓަރ ޖެނެރަލް ޙުސައިން ނިޔާޒީ ވިދާޅުވީ، އަންނަ އަހަރު ޖުމްލަ 394 އޮޑިޓެއް ކުރިއަށް ގެންދިއުމަށް ރާވާފައިވާ ކަމަށެވެ. މީގެ ތެރޭގައި ދައުލަތުގެ މުއައްސަސާތަކާއި ސަރުކާރު ހިއްސާވާ ކުންފުނިތަކުގެ އިތުރުން މިއަހަރު މަސައްކަތް ނުނިމި ހުރި އޮޑިޓްތައްވެސް ހިމެނެއެވެ.
އަންނަ އަހަރު ކުރިއަށް ގެންދިއުމަށް ހަމަޖެހިފައިވާ މުހިންމު އޮޑިޓްތަކުގެ ތެރޭގައި ހިމެނެނީ:
- ދައުލަތުގެ މުއައްސަސާތަކުގެ 61 ފައިނޭންޝަލް އަދި ކޮމްޕްލަޔަންސް އޮޑިޓް
- ލޯކަލް ކައުންސިލްތަކުގެ 106 އޮޑިޓް
- ދައުލަތުގެ ކުންފުނިތަކުގެ 40 އޮޑިޓް
- ބޭރުގެ އެހީގައި ހިންގާ މަޝްރޫޢުތަކުގެ 22 އޮޑިޓް
- ސްޕެޝަލް އޮޑިޓްގެ 8 އޮޑިޓް
- އިންފޮމޭޝަން ސިސްޓަމްތަކާ ގުޅޭ 7 އޮޑިޓް
- ތިމާވެއްޓާ ގުޅުންހުރި 6 އޮޑިޓް އަދި ޕާފޯމަންސް 6 އޮޑިޓް
- ޕަބްލިކް ފަންޑާއި ސްކީމްތަކުގެ 6 އޮޑިޓް
- ބަޖެޓާއި ފިސްކަލް ޓްރާންސްޕޭރެންސީ ޤާނޫނުގެ ދަށުން ކުރަންޖެހޭ 5 އޮޑިޓް
- މާލީ އިދާރާތަކުގެ 4 އޮޑިޓް އަދި ދައުލަތުގެ ދަރަންޏާއި ގެރެންޓީއާ ގުޅޭ 3 އޮޑިޓް
- މި އަހަރު ނުނިމި ހުރި 120 އޮޑިޓް
މި އަހަރަށް މަޖިލީހުން އޮޑިޓް އޮފީހަށް ކަނޑައެޅީ 134.2 މިލިއަން ރުފިޔާގެ ބަޖެޓެކެވެ. މީގެ ތެރެއިން މިހާތަނަށް 56.9 މިލިއަން ރުފިޔާ ޚަރަދުވެފައިވާއިރު، އަހަރު ނިމޭއިރު ބޭނުން ނުކުރެވި ގާތްގަނޑަކަށް 31 މިލިއަން ރުފިޔާ ބާކީ ހުންނާނެ ކަމަށް އޮޑިޓަރ ޖެނެރަލް ވިދާޅުވިއެވެ. އަދި އަންނަ އަހަރުގެ ބަޖެޓު އެކުލަވާލާފައިވަނީ އެ ފައިސާވެސް ހިމަނައިގެން ކަމަށް އެމަނިކުފާނު ފާހަގަކުރެއްވިއެވެ.
މާލިއްޔަތު ކޮމިޓީން ބަޖެޓު ފާސްކުރީ އޮޑިޓް އޮފީހުން ހުށަހެޅި ގޮތަށް ބަދަލެއް ނުގެނެސް ފާސްކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫހު ހުށަހެޅުއްވި ހުށަހެޅުމަށް، ކޮމިޓީގައި ބައިވެރިވެވަޑައިގެންނެވި މެންބަރުންގެ އިއްތިފާގުން ވޯޓު ދެއްވައިގެންނެވެ.
ކިޔުންތެރިންގެ ހިޔާލު