ރަސްމާލޭގައި ހިންގާ 20 ބިލިއަން ޑޮލަރުގެ މަޝްރޫއުގެ ސަބަބުން އިމާރާތްކުރުމުގެ މަރުހަލާގައި 40,000 ވަޒީފާ ލިބޭނެ ކަމަށް ޔޫއޭއީގެ އީގަލް ހިލްސް ކުންފުނީގެ ޗެއާމަން މުޙައްމަދު އަލީ އަލްއައްބާރު ވިދާޅުވެއްޖެއެވެ.
ސަން އޮންލައިނަށް ދެއްވި ޚާއްސަ އިންޓަވިއުއެއްގައި، އަލްއައްބާރު ވިދާޅުވި ގޮތުގައި ސަރުކާރުން ހުށަހަޅާފައިވާ މި މަޝްރޫއުގެ ސަބަބުން 15,000 އާއި 18,000 އާ ދެމެދުގެ އަދަދަކަށް ދާއިމީ ވަޒީފާ އުފެދޭނެއެވެ. މި އިންޓަވިއު ބާއްވާފައިވަނީ މިދިޔަ ބުރާސްފަތި ދުވަހުއެވެ.
މި ދާއިމީ ވަޒީފާތައް އުފެދިގެންދާނީ އެ ތަނުގައި ތަރައްގީކުރާ މީހުން ދިރިއުޅޭ އިމާރާތްތަކާއި، ހޮޓާތަކާއި، ވިޔަފާރިކުރާ ތަންތަނުގެ އިތުރުން ޕާކުތަކާއި ސްކޫލްތައް ފަދަ ވަސީލަތްތަކުގެ ތެރެއިން ކަމަށް އަލްއައްބާރު ފާހަގަކުރެއްވިއެވެ. އީގަލް ހިލްސްއިން ތަރައްގީކުރާ ތަންތަނުގެ ފެންވަރު ރަނގަޅުވުމުގެ ސަބަބުން، އެ ކުންފުނީގެ މަޝްރޫއުތަކުގައި އާންމުކޮށް މުސާރައިގެ އޮނިގަނޑު އެހެން ތަންތަނަށް ވުރެ ބޮޑުވާނެ ކަމަށް ވެސް އޭނާ ވިދާޅުވިއެވެ.
މީގެ އިތުރުން، އިމާރާތްކުރުމުގެ މަރުހަލާގައާއި އޭގެ ފަހުން ވެސް މުދަލާއި ހިދުމަތް ފޯރުކޮށްދިނުމުގެ ފުރުސަތު ދިވެހި ކުންފުނިތަކަށް ލިބި، އޭގެ ސަބަބުން ވިޔަފާރިތަކަށް ބޮޑު ކުރިއެރުމެއް ލިބިގެންދާނެ ކަމަށް އޭނާ ވިދާޅުވިއެވެ.
މި މަޝްރޫއުގެ ސަބަބުން ފަތުރުވެރިކަމާއި އިންވެސްޓްމަންޓްތައް އިތުރުވެ، އިގުތިސާދީ ހަރަކާތްތައް ފުޅާވެގެންދާނެ ކަމަށް އީގަލް ހިލްސްއިން ސިފަކުރެއެވެ. އެހެން ގައުމުތަކުގައި އެ ކުންފުނިން ހިންގާފައިވާ މިފަދަ މަޝްރޫއުތަކުގެ ތަޖުރިބާއަށް ބިނާކޮށް އަލްއައްބާރު އަންދާޒާކުރައްވާ ގޮތުގައި، ރަސްމާލެ މަޝްރޫއުގެ ސަބަބުން އިތުރު އެއް މިލިއަން ފަތުރުވެރިން ރާއްޖެއަށް ކޮންމެ އަހަރަކު ޒިޔާރަތްކުރާނެއެވެ. އަދި މި މަޝްރޫއުގެ މުއްދަތުގެ ތެރޭގައި ޓެކްސްގެ ގޮތުގައި ދެ ބިލިއަނެއްހާ ޑޮލަރުގެ އާމްދަނީއެއް ސަރުކާރަށް ލިބޭނެ ކަމަށް ވެސް އެ ބޭފުޅާ ވިދާޅުވިއެވެ.
ރަސްމާލެއަކީ 99 އަހަރުގެ މުއްދަތަކަށް 500 ހެކްޓަރުގެ ބިން ކުއްޔަށް ދީގެން، ދިވެހި ސަރުކާރާއި އީގަލް ހިލްސް ގުޅިގެން ހިންގުމަށް ހުށަހަޅާފައިވާ ބޮޑު މަޝްރޫއެކެވެ. މި އެއްބަސްވުމުގެ ދަށުން 5,000 ހައުސިން ޔުނިޓް އެޅުމަށް އީގަލް ހިލްސްއިން ފަންޑުކުރާނެއެވެ. އަލްއައްބާރު ވިދާޅުވި ގޮތުގައި ގާތްގަނޑަކަށް 500 މިލިއަން ޑޮލަރުގެ އަގުހުރި މި ބޯހިޔާވަހިކަމުގެ ބަޔަށް ފުރަތަމަ ހަރަދުކުރާނީ އެ ކުންފުނިންނެވެ. އަދި ފަހުން މުޅި މަޝްރޫއުގެ ތެރެއިން އެ އިންވެސްޓްމަންޓް އަނބުރާ ހޯދާނެއެވެ.
މި މަޝްރޫއުގެ އަމަލީ މަސައްކަތް ފެށުމުގެ ކުރިން ތަފްސީލީ ޑިޒައިންތަކާއި ތިމާވެއްޓަށް އަސަރުކުރާ މިންވަރު ވަޒަންކުރުމުގެ މަސައްކަތްތައް ކުރިއަށް ގެންދަން ޖެހެއެވެ. އަލްއައްބާރު ވިދާޅުވި ގޮތުގައި، އަންދާޒާކުރެވޭގޮތުން އިމާރާތްކުރުމުގެ މަސައްކަތް ފެށޭނީ ގާތްގަނޑަކަށް އެއް އަހަރު ފަހުންނެވެ. ނަމަވެސް ވަރަށް އަވަހަށް މި މަޝްރޫއުގެ އެއްބަސްވުމުގައި ސޮއިކުރެވޭނެ ކަމަށް އުއްމީދުކުރައްވާ ކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު