ރަސްމާލެ މަޝްރޫއަށް ބިން ކުއްޔަށް ދިނުމާ ގުޅޭގޮތުން އުފެދިފައިވާ ކަންބޮޑުވުންތަކަށް ރައްދުދެއްވަމުން، ރާއްޖޭގެ ގާނޫނުތަކާއި ގަވާއިދުތަކަށް އިންވެސްޓަރުން ފުރިހަމައަށް އިހުތިރާމުކުރަން ޖެހޭނެ ކަމަށް ޔޫއޭއީގެ އީގަލް ހިލްސް ކުންފުނީގެ ޗެއާމަން މުޙައްމަދު އަލީ އަލްއައްބާރު ވިދާޅުވެއްޖެއެވެ.
މަޝްރޫއުތައް ހިންގާ ގައުމެއްގެ ގާނޫނުތަކަށް ޑިވެލޮޕަރުން ފުރިހަމައަށް ތަބާވާން ޖެހޭނެ ކަމަށާއި، އެ ގަވާއިދުތައް ގަބޫލުނުކުރެވޭ ނަމަ އެފަދަ މަޝްރޫއުތަކާ ހަވާލުވެގެން ނުވާނެ ކަމަށް އޭނާ ވިދާޅުވިއެވެ. މި ޚިޔާލުތައް ފާޅުކުރައްވާފައިވަނީ ރާއްޖޭގެ ނޫހަކަށް ދެއް ޚާއްސަ އިންޓަވިއުއެއްގައެވެ.
ރަސްމާލެއިން ބިން ދިގު މުއްދަތަކަށް ދޫކުރުމުގެ މައްސަލައިގައި އާންމުންގެ މެދުގައި ބޮޑެތި ބަހުސްތަކެއް ހިނގަމުންދާއިރު، މިކަމުގެ ސަބަބުން ގައުމީ އިސްތިގުލާލާއި ދިގު ރާސްތާގެ މަސްލަހަތާ މެދުބައެއް ފަރާތްތަކުން އަންނަނީ ސުވާލު އުފައްދަމުންނެވެ. ޚާއްސަކޮށް، ބިދޭސީ އިންވެސްޓަރުންނަށް ލިބިދާނެ ބާރުތަކާއި، ބިން ކުއްޔަށް ދިނުމުގެ އޮނިގަނޑާ މެދު އާންމުން ދަނީ ކަންބޮޑުވުން ފާޅުކުރަމުންނެވެ.
ގާނޫނުތަކަށް އިންވެސްޓަރުން ބޯލަނބަން ޖެހޭނެ ކަން ފާހަގަކުރައްވަމުން އަލްއައްބާރު ވިދާޅުވީ، ސަރުކާރުން ވަގުތުޖެހުމުން ގާނޫނުތަކަށް ބަދަލު ގެނައި ނަމަވެސް އިންވެސްޓަރުން އެކަމަށް އިހުތިރާމުކުރަން ޖެހޭނެ ކަމަށެވެ. އަދި މުޖުތަމައުގެ ޝައުގުވެރިކަމާއި ތާއީދު ނެތް ނަމަ އެފަދަ މަޝްރޫއުތައް ކުރިއަށް ނުގެންދާނެ ކަމަށް އޭނާ ވިދާޅުވިއެވެ.
އާންމުންގެ ކަންބޮޑުވުންތަކަށް ޒިންމާދާރުކަމާއެކު ޖަވާބުދާރީވާން ޖެހޭނެ ކަމަށާއި، އެކަންކަން ހައްލުނުކުރެވޭ ނަމަ މަޝްރޫއު ދޫކޮށްލަން ޖެހޭނެ ކަމަށް ވެސް އޭނާ ވިދާޅުވިއެވެ. މި މަޝްރޫއުގެ ފުރިހަމަ ތަފްސީލުތައް އެއްބަސްވުންތައް ނިމުމުން ސަރުކާރުން ހާމަކުރާނެ ކަމަށް އުއްމީދުކުރައްވާ ކަމަށް އޭނާ ފާހަގަކުރެއްވިއެވެ.
ކިޔުންތެރިންގެ ހިޔާލު