ރާއްޖޭގެ މީހުން ދިރިއުޅޭ ރަށްރަށުގެ ތެރެއިން 1،000 މީހުންގެ އާބާދީ ހަމަވާ ކޮންމެ ރަށެއްގައި އަދި އެއާޕޯޓް އޮންނަ ކޮންމެ ރަށެއްގައި ޕާސްޕޯޓުގެ ހިދުމަތް ލިބޭނެ އިންތިޒާމު ހަމަޖެއްސެވުމަށް ރައީސް ޑރ. މުހައްމަދު މުއިއްޒު އަންގަވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން ވިދާޅުވީ، ރާއްޖޭގެ ވީހާވެސް ގިނަ ރަށްރަށަކުން ލުއިފަސޭހަކަމާއެކު ޕާސްޕޯޓް ލިބޭނެ އިންތިޒާމު ހަމަޖެއްސުމަކީ ސަރުކާރުގެ މައިގަނޑު ސިޔާސަތު ކަމަށެވެ. މި ސިޔާސަތުގެ ދަށުން ރައްޔިތުންނަށް ދަތުރުފަތުރުގެ ދަތިކަމާއި އިތުރު ހަރަދުތަކާ ނުލައި އަމިއްލަ ރަށުގައި ތިބެގެން އަސާސީ ހިދުމަތްތައް ހޯދުމުގެ ފުރުސަތު ފަހިވެގެންދާނެ ކަމަށް އޭނާ ފާހަގަކުރެއްވިއެވެ.
ވެރިކަމާ ހަވާލުވެވަޑައިގެންނެވިއިރު ޕާސްޕޯޓުގެ ހިދުމަތް ލިބެމުންދިޔައީ އެންމެ ފަސް ސަރަހައްދަކުން ކަމަށާއި، ނަމަވެސް މިހާރު އެ ހިދުމަތް 39 ސަރަހައްދަކުން ލިބެމުންދާ ކަމަށް މިނިސްޓަރު ވިދާޅުވިއެވެ. މިއީ ރައްޔިތުންނަށް ލުއިފަސޭހަކޯށްދިނުމަށް ގެންދެވޭ މުހިންމު ބަދަލެއް ކަމަށް އޭނާ ވިދާޅުވިއެވެ. މީގެ އިތުރުން ރާއްޖެއިން ބޭރުގައި ދިރިއުޅޭ ދިވެހިންނަށް ފަސޭހަކަމާއެކު ހިދުމަތް ދިނުމުގެ ގޮތުން މެލޭޝިއާ އާއި ސްރީލަންކާގެ ޑިޕްލޮމެޓިކް މިޝަންތަކުންވެސް މިހާރު ޕާސްޕޯޓުގެ ހިދުމަތް ލިބެމުންދާކަން އޭނާ ފާހަގަކުރެއްވިއެވެ.
އާ އަމާޒާ އެއްގޮތަށް ކުރިއަށް އޮތް ފެބްރުއަރީ މަހާ ހަމައަށް ޖެހެންވާ އިރަށް، އެ މިންގަނޑު ހަމަވާ ރަށްރަށުގައި ވެސް ޕާސްޕޯޓުގެ ހިދުމަތް ފެށިގެންދާނެ ކަމަށް މިނިސްޓަރު ވިދާޅުވިއެވެ. އެ މިންގަނޑަށް ބަލާއިރު އިތުރު ހަތަރު ރަށެއްގައި މި ހިދުމަތް އަލަށް ފަށަންޖެހޭ ކަމަށާއި، އެކަމަށް ބޭނުންވާ ތައްޔާރީތައް މިހާރު ކުރިއަށްދާ ކަމަށް ސަރުކާރުން ބުނެއެވެ.
ކިޔުންތެރިންގެ ހިޔާލު