ލޯކަލް ގަވަމެންޓް އޮތޯރިޓީ (އެލްޖީއޭ) ގެ ބޯޑަށް ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސުންގެ ތެރެއިން މެންބަރުން ހޮވުމަށް ބާއްވާ އިންތިޚާބު މި މަހުގެ 31 ދުވަހު ބޭއްވުމަށް އެ އޮތޯރިޓީން ނިންމައިފިއެވެ.
މި އިންތިޚާބަކީ އިދާރީ މައްސަލަތަކަކާ ގުޅިގެން މީގެ ކުރިން މުއްދަތެއް ނެތް ގޮތަށް ފަސްކުރުމަށްފަހު އަލުން ބޭއްވުމަށް ތައްޔާރުވަމުންދާ އިންތިޚާބެކެވެ.
ސަރުކާރުގެ ގެޒެޓުގައި އެލްޖީއޭއިން ޝާއިއުކޮށްފައިވާ އިއުލާނުގައިވާ ގޮތުން، މި އިންތިޚާބުގެ ވޯޓު ނެގުން ކުރިއަށްދާނީ އެ ދުވަހުގެ ހެނދުނު ދިހައަކުން ހަވީރު ހަތަރަކަށެވެ.
އެ އޮތޯރިޓީން ވަނީ ޖުލައި މަހުގެ 21 ވަނަ ދުވަހު ގުރުލައިގެން ތަރުތީބުކުރި ކެންޑިޑޭޓުންގެ ނަންތައް ކުރިއެކޭވެސް އެއްގޮތަށް އަލުން އާންމުކޮށްފައެވެ.
ރަށު ކައުންސިލަރުންގެ ތެރެއިން މި އިންތިޚާބުގައި ވާދަކުރައްވަނީ ފ. ނިލަންދޫ ކައުންސިލްގެ ރައީސް އަލީ އަހުމަދާއި ނ. މަނަދޫ ކައުންސިލްގެ ރައީސް އަލީ ޒާފިރެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސުންގެ ތެރެއިން ވާދަކުރައްވަނީ ލ. ގަމު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސް މަރިޔަމް ނީނާއާއި ށ. ފުނަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސް މަރިޔަމް ޒީނާއެވެ.
އެލްޖީއޭގެ ސީއީއޯ މުޙައްމަދު ނިމާލު ކުރިން ވިދާޅުވެފައިވަނީ އިންތިޚާބު ފަސްކުރަން ޖެހުނީ ތައްޔާރީތައް ކުރިއަށްދަނިކޮށް ކައުންސިލްތަކުން ހުށަހެޅި މައްސަލަތަކާއި ޝަކުވާތަކާ ގުޅިގެން ކަމަށެވެ.
ލާމަރުކަޒީ ގާނޫނުގެ ދަށުން އެލްޖީއޭއަށް ލިބިގެންވާ ބާރުތަކުގެ ތެރޭގައި ކައުންސިލަރުން މަގާމުގެ ނާޖާއިޒު ފައިދާ ނެގުމާއި މަސްއޫލިއްޔަތު އަދާނުކުރުން ފަދަ ކަންކަމުގައި ފިޔަވަޅު އެޅުމާއި ވަކި މުއްދަތަކަށް މަގާމުން އެކަހެރިކުރުން ހިމެނެއެވެ.
ކިޔުންތެރިންގެ ހިޔާލު