މޯލްޑިވްސް ޙައްޖު ކޯޕަރޭޝަން ލިމިޓެޑްގެ މާލީ ހާލަތު ރަނގަޅުކޮށް، ކުންފުންޏަށް މާލީ ފައިދާ އިތުރުކުރުމަށްޓަކައި ހުޅުމާލޭގައި ތަރައްޤީކުރުމަށް ހަމަޖެހިފައިވާ ލަގްޒަރީ ހައުސިންގ މަޝްރޫޢު “ނިއަމް ރެސިޑެންސް” ގެ އެޕާޓްމަންޓް ޔުނިޓުތައް އާންމުކޮށް ވިއްކުމަށް ހުޅުވާލުމުގެ މަސައްކަތް ފަށައިފިއެވެ.
ހައްޖު ކޯޕަރޭޝަނުން ރޭ ނެރުނު ނޫސްބަޔާނެއްގައި ބަޔާންކޮށްފައިވާ ގޮތުގައި، މި މަޝްރޫޢުގެ ތެރެއިން ތަރައްޤީކުރެވޭ ކޮންމެ އެޕާޓްމަންޓް ޔުނިޓަކުން ކުންފުންޏަށް އެންމެ ބޮޑު މާލީ މަންފާއެއް ލިބޭނެ ގޮތަށް ކަންކަން ރޭވުމަށްޓަކައި، ޔުނިޓުތަކުގެ އަގުތައް އަލުން ކަނޑައެޅުމުގެ މަސައްކަތް މިހާރު ދަނީ ކުރެވެމުންނެވެ. އަދި އެ މަސައްކަތްތައް ނިމުމުން، ޢާންމުކޮށް އެންމެންނަށް ހުޅުވާލައިގެން އެޕާޓްމަންޓްތައް ވިއްކުމުގެ ކަންކަން ކުރިއަށް ގެންދާނެ ކަމަށް ވެސް އެ ކޯޕަރޭޝަނުން މައުލޫމާތު ދެއެވެ.
މީގެއިތުރުން، މި ޕްރޮޖެކްޓުން ކުންފުންޏަށް އެންމެ ފައިދާހުރި ގޮތުގައި ކަންކަން ކުރިއަށް ގެންދިއުމަށްޓަކައި، ކޯޕަރޭޝަންގެ މުވައްޒަފުންނަށް އެޕާޓްމަންޓުތައް ވިއްކުމަށް މިހާތަނަށް ކޮށްފައިވާ އެންމެހާ މުޢާމަލާތްތައް ބާތިލުކުރުމަށް ނިންމާފައިވާ ކަމަށް ވެސް ހައްޖު ކޯޕަރޭޝަންގެ ބަޔާނުގައި ފާހަގަކޮށްފައިވެއެވެ.
ކިޔުންތެރިންގެ ހިޔާލު