މާލެ އުތުރު ފަރާތު ބަނދަރު ތަރައްޤީކުރުމަށްޓަކައި މަސްވެރިންގެ ޕާކު ސަރަޙައްދުން ފެށިގެން ނާދީ ގޯޅިއާ ހަމައަށް އަޅާފައިވާ އުޅަނދުތައް ނެގުމަށް އަންގައިފިއެވެ.
ބިނާރާ ގެދޮރުވެރިކަމާ އުމްރާނީ ތަރައްޤީއާ ބެހޭ ވުޒާރާއިން ބުނީ އެސަރަޙައްދުގެ ބަނދަރު ތަރައްޤީކުރަނީ އެތަން ބޭނުންކުރާ ފަރާތްތަކަށް ދިމާވަމުންދާ ދަތިތަކަށް ހައްލެއް ގެނެސްދިނުމަށްކަމަށެވެ. އެވުޒާރާއިންވަނީ އެ ސަރަޙައްދުގައި އަޅާފައިވާ އުޅަނދުފަހަރު ހުކުރު ދުވަހުގެ ރޭ 11 ޖެހުމުގެ ކުރިން ނެގުމަށް އަންގާފައެވެ. އަދި އެމުއްދަތުގެ ފަހުން އެސަރަޙައްދުގައި ނުނަގާ ހުންނަ އުޅަނދުތައް އެވުޒާރާގެ ފަރާތުން ނަގާނެކަމަށްވެސް ބުންޏެވެ.
މާލޭ އުތުރު ފަރާތު ބަނދަރަކީ މާލެއަށް ލަފާފުރުމުގައި ގިނަ ބަޔަކު ބޭނުންކުރާ ސަރަޙައްދެކެވެ. ސަރުކާރުން ބޮޑުތަކުރުފާނު މަގު ތަރައްޤީކުރުމަށް ކުރިއަށްގެންދިޔަ މަޝްރޫޢާއެކު އެސަރަޙައްދުގެ ޖެޓީތައްވެސް ތަރައްޤީކުރުމަށްވަނީ ހަމަޖެހިފައެވެ.
މާލޭ އުތުރު ފަރާތުން ބޮޑުތަކުރުފާނު ތަރައްޤީކުރަމުންދާއިރު އެސަރަޙައްދުގައި ބޮޑު ޕާކިންގއެއްވެސްވަނީ ޤާއިމުކޮށްފައެވެ. ހަމައެއާއެކު އެއީ ގިނަބަޔަކު ލަފާ ފުރުމުގައި ކޮންމެ ދުވަހަކުވެސް ބޭނުންކުރާ މުހިއްމު ހިސާބެއްކަމުން، އެސަރަޙައްދުގެ ޖެޓީތައްވެސް އާންމުންނާއި ދަތުރުވެރިންނަށް ފަސޭހަވާނެހެން ތަރައްޤީކުރުމަށް ސަރުކާރުންވަނީ ނިންމާފައެވެ.
ކިޔުންތެރިންގެ ހިޔާލު