މަސްތުވާތަކެތި ވިއްކައިގެން މަންފާ ހޯދުން ނިމުމަކަށް ގެނައުމަށް ކުރަމުން އަންނަ މަސައްކަތުން އެފަދަ އެއްވެސް ވިޔަފާރިއެއް ރާއްޖޭގައި މިހާރު ކުރެވޭނެ ޖާގައެއް ނޯންނާނެކަމަށް ދާޚިލީ ސަލާމަތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރުންގެ “އަހާ” ފޯރަމުގައި އިޙްސާން ވިދާޅުވީ މަސްތުވާތަކެތީގެ ވިޔަފާރިކޮށްގެން އެއިން މަންފާ ހޯދަމުންދާ އެތައް ބަޔަކު ރާއްޖޭގައި ތިބިއިރު އަދުގެ ސަރުކާރުން އެކަން ހައްލުކުރުމަށް ދެ ގޮތަކުން މަސައްކަތް ފެއްޓެވި ކަމަށެވެ. އެގޮތުން، މަސްތުވާތަކެތީގެ ޝިކާރައަކަށްވެފައިވާ ފަރާތްތަކަށް ފަރުވާ ދިނުން ހަރުދަނާ ކުރުމާއި ޑްރަގް ނެޓްވޯކުތައް ހުއްޓުވުމަށް ފާއިތުވެދިޔަ ދެ އަހަރާއި ބައިގެ ތެރޭގައި ގިނަ މަސައްކަތްތަކެއް ކުރެވިފައިވާ ކަމަށް ވަޒީރު ވިދާޅުވިއެވެ.
އިޙްސާން ވިދާޅުވީ ރާއްޖެއަށް މަސްތުވާތަކެތި އެތެރެކޮށް، އެއިން ކުރާ ވިޔަފާރީގައި މަންފާ ހޯދާ ފަރާތްތައް ހުއްޓުވުމަށް ކުރާ މަސައްކަތުގެ ދަށުން މިހާތަނަށް މުޅި ރާއްޖެއިން 24 ނެޓްވޯކެއް ދެނެގަނެވިފައިވާ ކަމަށެވެ. މީގެ ތެރެއިން 3 ނެޓްވޯކެއްގެ މައްސަލަ ބަލައި، ކޯޓު މަރުހަލާގައި އޮތްއިރު އެ މައްސަލަތަކުގައި 3.6 މިލިޔަން ރުފިޔާ އާއި 148،000 ޑޮލަރު ނަގުދު ފައިސާ އަތުލައިގެންފައިވާ ކަމަށާއި ގިނަ އަދަދެއްގެ މުދާވެސް ހިމެނޭ ކަމަށް ވިދާޅުވިއެވެ. މި މައްސަލަތައް ނިމޭއިރު އެ ފައިސާ އާއި މުދާ ދައުލަތަށް ނެގޭނެ ކަމަށްވެސް ވަޒީރު ވިދާޅުވިއެވެ.
ޑްރަގް ވިއްކައިގެން، ދިވެހިރާއްޖޭގެ ރައްޔިތުން ހާލުގައި ޖައްސާފައި ކުރެވޭނެ ވިޔަފާރިއެއް ދެން ރާއްޖޭގައި ނޯންނާނެ.
ދާޚިލީ ސަލާމަތާ ބެހޭ ވަޒީރު ޢަލީ އިޙްސާން ވިދާޅުވިއެވެ.
ރާއްޖޭގެ އެކި ރަށްރަށުގައި ކެފޭތަކުގެ ގޮތުގައި މަސްތުވާތަކެތި ވިއްކައި އެތަކެތި ބޭނުންކުރާ ތަންތަން ހުއްޓުވުމަށް ކުރާ މަސައްކަތާ ގުޅޭ އެންމެ ފަހުގެ މައުލޫމާތުވެސް ވަޒީރު ވަނީ ހިއްސާކުރައްވާފައެވެ. އެގޮތުން، ޤާނޫނަށް ގެނައި އިސްލާހުތަކާއެކު މިހާތަނަށް 17 ތަނެއް ބަންދުކޮށްފައިވާ ކަމަށާއި އޭގެ ތެރޭގައި އައްޑު އަތޮޅުގެ 4 ތަނަކާއި ފުވައްމުލައް ސިޓީގެ ތަނަކާއި މާލޭގެ 12 ތަނެއް ހިމެނޭ ކަމަށް ވިދާޅުވިއެވެ.
ވަޒީރު ވިދާޅުވީ ރާއްޖެއަށް މަސްތުވާތަކެތި އެތެރެކުރުން ހުއްޓުވުމުގެ ގޮތުންވެސް މިދިޔަ ދެއަހަރާ ބައިގެ ތެރޭގައި ކާމިޔާބު މަސައްކަތްތަކެއް ކުރެވިފައިވާ ކަމަށެވެ. އެ މުއްދަތުގެ ތެރޭގައި 1.3 ޓަނުގެ މަސްތުވާތަކެތި އަތުލައިގެންފައިވާ ކަމަށް ވިދާޅުވިއެވެ.
ކިޔުންތެރިންގެ ހިޔާލު