ދަތުގެ ފަރުވާ ދެއްވުމުގައި މުޅި ރާއްޖެއަށް މަޤުބޫލުވި ޚިދުމަތްތެރިޔާ ޢަބްދުﷲ ސަޢީދު (ދަތްޖަހާ ސަޢީދު) އަވަހާރަވުމަކީ ޤައުމަށް ލިބުނު ވަރަށް ބޮޑު ހިތާމައެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު އަވަހާރަވީ އިންދިރާ ގާންދީ މެމޯރިއަލް ހޮސްޕިޓަލުގައި އެނދުމަތީގައި ފަރުވާ ދެމުން ދަނިކޮށް ރޭގެ ވަގުތެއްގައެވެ.
ޢަބްދުﷲ ސަޢީދަކީ ދިގު މުއްދަތެއްގައި ރާއްޖޭގެ ޞިއްޙީ ދާއިރާއަށް އަގުހުރި ޚިދުމަތްތަކެއް ކުރެއްވި ބޭފުޅެކެވެ. މީގެ އިތުރުން ދިވެހި މަސައްކަތްތެރިކަމުގެ އެކި ފަންނުތަކުގައިވެސް އެމަނިކުފާނު ވަނީ ބޮޑެތި ކާމިޔާބީތަކެއް ހާސިލު ކުރައްވައި، ގިނަ ބައެއްގެ އިޙްތިރާމާއި ލޯބި ހޯއްދަވާފައެވެ.
ރައީސުލްޖުމްހޫރިއްޔާގެ މެސެޖުގައި މަރުޙޫމް ޢަބްދުﷲ ސަޢީދުގެ ފާފަ ފުއްސަވައި މާތްﷲގެ ރަޙްމަތާއި އޯގާވަންތަކަމުގައި އަދި ސުވަރުގޭގެ ދާއިމީ ނިޢުމަތުގައި ލެހެއްޓެވުން އެދި ދުޢާ ކުރައްވާފައިވެއެވެ. އަދި މަރުޙޫމުގެ ޢާއިލާއަށް ލިބިފައިވާ ފުން ހިތާމައިގައި ބައިވެރިވެވަޑައިގެން ތަޢުޒިޔާ ފޮނުއްވާފައިވެއެވެ.
ކިޔުންތެރިންގެ ހިޔާލު