ދަނޑުވެރިކަމުގެ ބޭނުމަށް ދޫކޮށްފައި ހުރި ފަޅުރަށްތަކުގެ ތެރެއިން، އެ ރަށްތައް ކުއްޔަށް ނަގާފައިވާ ފަރާތްތަކުން ހުށަހަޅާފައިވާ މަސައްކަތު ޕްލޭނާ އެއްގޮތަށް މަސައްކަތް ކުރިއަށްނުދާ ރަށްރަށް ދެނެގަތުމަށްފަހު، އެ ރަށްތައް ކުއްޔަށް ދޫކުރަން ހަދާފައި ހުރި އެއްބަސްވުންތައް ސަރުކާރުން ބާތިލުކުރާނެކަން މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކޮށްފިއެވެ.
ކާނާގެ ރައްކާތެރިކަން ކަށަވަރުކުރުމަށް ސަރުކާރުން މަސައްކަތްކުރަމުންދާއިރު، ދަނޑުވެރިކަމުގެ ބޭނުމަށް ދޫކޮށްފައި ހުރި ރަށްރަށުގައި އެކަށީގެންވާ ގޮތަށް ދަނޑުވެރިކަމުގެ މަސައްކަތްތައް ކުރެވެމުންދާކަން ކަށަވަރުކުރުމަށް ސަރުކާރުން ކުރާ މަސައްކަތްތަކާ ގުޅޭ ގޮތުން، ރޭ އޮތް “އަހާ” ފޯރަމުގައި އާއްމު މީހަކުވަނީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމާ ސުވާލުކޮށްފައެވެ.
އެ ސުވާލަށް ޖަވާބުދެއްވަމުން ވަޒީރު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގަތް ދުވަހުން ފެށިގެން ސަރުކާރުން ދަނޑުވެރިކަމުގެ ބޭނުމަށް ދޫކޮށްފައި ހުރި ރަށްރަށުގެ އިންސްޕެކްޝަންތައް ކުރިއަށްގެންދާ ކަމަށެވެ. ވަޒީރު ވިދާޅުވި ގޮތުގައި މި އިންސްޕެކްޝަންތަކުގެ ބޭނުމަކީ ރަށްރަށް ކުއްޔަށް ނަގާފައިވާ ފަރާތްތަކުން ހުށަހަޅާފައި ހުުރި ވޯކް ޕްލޭނާ އެއްގޮތަށް މަސައްކަތް ކުރިއަށްދާކަން ކަށަވަރުކުރުމެވެ.
ވަޒީރު ވިދާޅުވި ގޮތުގައި ރާއްޖެ ފަދަ ކުޑަ އާބާދީއެއް އޮތް ގައުމެއްގައި ގިނަ އަދަދެއްގެ ރަށްރަށް ދަނޑުވެރިކަމަށް ދޫކުރެވިފައި ހުރުމަކީ އެ ދާއިރާއިން ބޭރުގެ އަދި ރާއްޖޭގެ އިންވެސްޓުމެންޓުތައް ހޯދުމަށް ކުރިމަތިވާނެ ހުރަހެއް ނުވަތަ ގޮންޖެހުމެކެވެ.
“އެހެންވީމާ އަޅުގަނޑު ބެލީ މި ރަށްރަށުގައި އެބޭފުޅުން ހުށަހަޅުއްވާފައި ހުރި ވޯކް ޕްލޭނާ އެއްގޮތަށް މަސައްކަތް ކުރިއަށްދޭތޯ، އެ އޮބްޖެކްޓިވްސް ހާސިލުވޭތޯ. ހާސިލުނުވާނަމަ، ގަބޫލުކުރައްވާ އެ ރަށްރަށް އަޅުގަނޑުމެން ނުބާއްވާނަން. އަޅުގަނޑަކަށް ޕޮލިޓިކަލް ޕްރެޝާ ނާންނާނެ މިކަހަލަ ރަށްރަށް ޓާމިނޭޓުކުރުމުގައި،” ޝިޔާމު ވިދާޅުވިއެވެ.
ޝިޔާމު ވިދާޅުވީ މިފަދަ ރަށްރަށުގެ އެއްބަސްވުންތައް ބާތިލުކުރުމަކީ ލިބޭ ގެއްލުމަކަށްވީ ނަމަވެސް، ރައީސް ޑރ.މުޢިއްޒުގެ މެނިފެސްޓީގައި ކަނޑައަޅުއްވާފައިވާ އަމާޒުތައް ހާސިލުކުރުމުގައި ކުރިމަތިވާ މިފަދަ ހުރަސްތައް ނައްތައިލުމަކީ ސަރުކާރުން ކޮންމެހެން ކުރަންޖެހޭ ކަމެއް ކަމަށެވެ.
ވަޒީރު ފާހަގަކުރެއްވި ގޮތުގައި ދަނޑުވެރިކަމުގެ ބޭނުމަށް ކުއްޔަށް ދޫކޮށްފައި ހުރި ހުރިހާ ރަށެއްގައި ވޯކް ޕްލޭނާ އެއްގޮތަށް މަސައްކަތް ކުރެވޭނަމަ، ރާއްޖެއިން ބޭރުން އެތެރެކުރާ ބައެއް ބާވަތްތައް އެތެރެކުރުން ވަރަށް ބޮޑަށް މަދުކުރެވި އެބާވަތްތައް ރާއްޖޭގައި އުފެއްދޭ މިންވަރު އެކަށީގެންވާ އަދަދަކަށް އިތުރުކުރެވުނީހެވެ.
މިގޮތަށް ހުރި ރަށްރަށުގެ އެއްބަސްވުންތައް ބާތިލުކުރުމުގެ މަސައްކަތް ކުރިއަށްގެންދަން ނިންމަވާފައިވާ ގޮތަށް އަލިއަޅުވައިލައްވަމުން ވަޒީރު ވިދާޅުވީ ވުޒާރާއިން ފުރަތަމަ ބަލަނީ ވަކި މުއްދަތެއް ދީގެން އެ މުހުލަތުގެ ތެރޭގައި ވޯކް ޕްލޭނާ އެއްގޮތަށް މަސައްކަތް ކުރިއަށްގެންދަން ބާރުއެޅުމަށް ކަމަށެވެ. އެ މުއްދަތުގައި މައްސަލަތައް ހައްލުކޮށް ވޯކް ޕްލޭނާ އެއްގޮތަށް މަސައްކަތް ކުރިއަށްނުގެންދެވޭނަމަ އެތަންތަނުގެ އެއްބަސްވުން ބާތިލުކޮށް ރަށްތައް އަނބުރާ ދައުލަތަށް އިއާދަކުރުމުގެ މަސައްކަތް ވުޒާރާއިން ކުރާނެކަމުގެ ޔަގީންކަން ވަޒީރު ދެއްވިއެވެ.
ކިޔުންތެރިންގެ ހިޔާލު