ނ. މަނަދޫގައި އިމާރާތް ކުރަމުންދާ ފިޓްނަސް އެންޑް ރެކްރިއޭޝަން ސެންޓަރުގެ އަމަލީ މަސައްކަތް ބާރަށް ކުރިއަށްދާ ކަމަށް އެމްޓީސީސީން ބުނެފިއެވެ.
އެ ކުންފުނިން ބުނީ މިހާރު ކުރިއަށްދަނީ ގްރައުންޑް ސްލެބް ކާސްޓްކުރުމާއި، ރީއިންފޯސްމަންޓް އަދި ފުރާޅުގެ ޓްރަސް އެސެމްބްލީގެ މަސައްކަތްތައް ކަމަށެވެ.
މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނ. އަތޮޅަށް ކުރެއްވި ރަސްމީ ދަތުރުފުޅުގެ ތެރެއިން، ކުޅިވަރާއި ދުޅަހެޔޮކަމުގެ ވަސީލަތްތައް ގާއިމުކުރުމަށް ސަރުކާރުން ކުރިއަށްގެންދާ ސިޔާސަތުގެ ދަށުން ފެއްޓެވި މަޝްރޫއެކެވެ. މި ސެންޓަރުގެ ބިންގާ އަޅުއްވައިދެއްވީ ކުޅިވަރާއި ފިޓްނަސް އެންޑް ރެކްރިއޭޝަން މިނިސްޓަރު އަބްދުالله ރާފިއުއެވެ.
މި ސެންޓަރުގެ އިތުރުން، އައުޓްޑޯ ޖިމަކާއި އިންޑިއާ ސަރުކާރުގެ އެހީގައި ގާއިމުކުރުމަށް ހަމަޖެހިފައިވާ މަލްޓި-ސްޕޯޓްސް ކޮމްޕްލެކްސްއާއެކު މަނަދޫގެ ކުޅިވަރު ވަސީލަތްތައް އިތުރަށް ފުރިހަމަވެގެންދާނެއެވެ. މިފަދަ ވަސީލަތްތަކުގެ މަގުސަދަކީ އާންމުންގެ މެދުގައި ދުޅަހެޔޮ ދިރިއުޅުމުގެ އާދަތައް އަށަގަންނުވައި، އިޖުތިމާއީ ބަދަހިކަން އިތުރުކުރުމެވެ.
މިނިސްޓަރު ރާފިއު ވިދާޅުވީ، މަނަދޫގައި ގާއިމުކުރާ ސެންޓަރަކީ މުޅި ރާއްޖެއަށް އަމާޒުކޮށްގެން ފިޓްނަސް އެންޑް ރެކްރިއޭޝަން ވަސީލަތްތައް ގާއިމުކުރުމަށް ފެށި ގައުމީ ހަރަކާތުގެ ފުރަތަމަ ފިޔަވަޅު ކަމަށެވެ. މި ޕްރޮގްރާމަކީ ދުޅަހެޔޮ ރާއްޖެއެއް ބިނާކުރުމަށް ރައީސް މުއިއްޒު ވެވަޑައިގެންފައިވާ ވައުދުފުޅާ އެއްގޮތަށް ކުރިއަށްގެންދާ މަޝްރޫއެއް ކަމަށްވެސް އޭނާ ވިދާޅުވިއެވެ.
މިނިސްޓަރު ސިފަކުރެއްވި ގޮތުގައި މިހާރު ފެށިގެން އުޅޭ ބިންގާެއެޅުންތަކަކީ ބޮޑު ކުޅިވަރު މަޝްރޫއެއްގެ ފެށުމެވެ. އައު އިމާރާތްތައް ބިނާކުރުމުގެ އިތުރުން، ފުޓްސަލް ދަނޑުތަކާއި ކުޅިވަރު މައިދާންތަކުގެ ލައިޓިން ސިސްޓަމްތައް ރަނގަޅުކުރުން ހިމެނޭހެން ބައެއް ވަސީލަތްތައް މަރާމާތުކޮށް ތަރައްގީކުރުމުގެ މަސައްކަތްވެސް މިނިސްޓްރީން ދަނީ ކުރަމުންނެވެ.
މި ސަރުކާރުން ހަވާލުވިފަހުން، ކުރިން ހުއްޓިފައި ހުރި މަޝްރޫއުތައް އަވަސްކޮށް، ގިނަ އައު މަޝްރޫއުތަކެއް ވަނީ ފަށާފައެވެ. މިނިސްޓަރު ރާފިއު ވިދާޅުވި ގޮތުގައި މި އަހަރުގެ ތެރޭގައި ފަންސާހަށްވުރެ ގިނަ ކުޅިވަރު މަޝްރޫއު ނިންމައި އާންމުންނާ ހަވާލުކުރެވިފައިވާ އިރު، ކުރިއަށް އޮތް އަހަރަކީ މިނިސްޓްރީގެ ތާރީހުގައިވެސް އެންމެ ގިނަ މަޝްރޫއު ނިންމޭނެ އަހަރަށް ވެގެންދާނެއެވެ.
ކިޔުންތެރިންގެ ހިޔާލު