ސްޕެނިޝް ލަލީގާގައި އެތްލެޓިކޯ މެޑްރިޑާއި ދެކޮޅަށް ރޭ ރެއާލް މެޑްރިޑް ކުޅުނު މެޗު 2-1 ގެ ނަތީޖާއަކުން ރެއާލް މެޑްރިޑް ބަލިވެއްޖެއެވެ.
މި މެޗުގައި ގިނައިރު ބޯޅަ ހިފަހައްޓައިގެން ކުޅެ ގިނަ ހަމަލާތައް އުފައްދާފައިވަނީ އެތްލެޓިކޯ މެޑްރިޑުންނެވެ.
މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބުކުރެވިފައިނުވި ނަމަވެސް މެޗުގެ އޮއިވަރު އެއްކޮށް ބަދަލުވެގެން ގޮސްފައިވަނީ މެޗުގެ 52 ވަނަ މިނިޓުގައި ރެއާލް މެޑްރިޑްގެ ޑީން ހުއިސަންއަށް ދެއްކި ރަތް ކާޑުންނެވެ. އޭނާއަށް ރަތް ކާޑު ދައްކާފައިވަނީ އޭރިޔާ ތެރެއިން އެތްލެޓިކޯ މެޑްރިޑްގެ ޖިއުލިއާނޯ ސިމިއޯނީގެ ޖާޒީގައި ހިފާ އޭނާ ވައްޓާލުމުގެ ސަބަބުން ވީޑިއޯ އެސިސްޓެންޓް ރެފްރީ އެކަން ރިވިއު ކުރުމަށްފަހުގައެވެ.
އެތްލެޓިކޯ މެޑްރިޑްއިން ލީޑު ނަގާފައިވަނީ އެ ޓީމަށް ލިބުނު ޕެނަލްޓީން މެޗުގެ 53 ވަނަ މިނިޓުގައި އަލެހަންދްރޯ ގްރިމަލްޑޯ ކާމިޔާބުކޮށްދިން ލަނޑުންނެވެ. ލީޑު ފުޅާކޮށްފައިވަނީ މެޗުގެ 59 ވަނަ މިނިޓުގައި ސިމިއޯނީ އަރިމަތިން ނަގައިދިން ހުރަހެއް ގޯލުގެ ތެރެއަށް ފޮނުވާލައިގެން ޖޮނަތަން ޑޭވިޑްއެވެ.
ރެއާލް މެޑްރިޑުން މި މެޗުގައި ޖެހި ހަމައެކަނި ލަނޑަކީ މެޗުގެ ފުރިހަމަ ވަގުތު ހަމަވާން މިނިޓަކަށް ވެފައިވަނިކޮށް އެންޓޯނިއޯ ރުޑިގާ ކާމިޔާބުކޮށްދީފައިވާ ލަނޑެކެވެ. އެތްލެޓިކޯ މެޑްރިޑްގެ ޑިފެންޑަރ ކްރިސްޓިއަން ރޮމޭރޯ ޖޫޑް ބެލިންހަމްއަށް ކުރި ފައުލަކާއި ގުޅިގެން އޭނާއަށް ރެފްރީ ރަތް ކާޑު ދެއްކި ނަމަވެސް ވީޑިއޯ އެސިސްޓެންޓް ރެފްރީ ވަނީ ރިވިއު ކުރުމަށްފަހު އެނިންމުން ބަދަލުކޮށްފައެވެ.
މި މެޗުން އެތްލެޓިކޯ މެޑްރިޑް މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 7 މެޗުން ލިފައިވާ 16 ޕޮއިންޓާއެކު ތާވަލުގެ ތިންވަނަ މަގާމް ލިބިފައެވެ. ރެއާލް މެޑްރިޑަށް ލިބިފައިވާ 15 ޕޮއިންޓާއެކު އެ ޓީމު ތާވަލުގެ ހަތަރުވަނައިގައި އޮތްއިރު އެއްވަނައިގައި އޮތް ވާދަވެރި ބާސެލޯނާއަށް ވަނީ 21 ޕޮއިންޓް ލިބިފައެވެ.
ކިޔުންތެރިންގެ ހިޔާލު