ސަރުކާރުގެ އަމާޒަކީ ދެހާސް ތިރީސް ތިން ވަނަ އަހަރު އަންނަންވާއިރަށް ރާއްޖެއަށް އަހަރަކު ފަސް މިލިއަން ޓޫރިސްޓުން ގެނައުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ޕީއެންސީގެ ކޮންގްރެސް ނިންމުމުގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ޓޫރިޒަމް ދާއިރާ ފުޅާކުރުމަށް ސަރުކާރުން ހާއްސަ މަސައްކަތްތަކެއް ކުރަމުންދާ ކަމަށެވެ. އަދި ރާއްޖެއަށް އަންނަ ޓޫރިސްޓުންގެ އަދަދު ކޮންމެ އަހަރަކު އިތުރުވަމުންދާކަން ފާހަގަކުރައްވަމުން އެމަނިކުފާނު ވިދާޅުވީ، މި ސިޔާސަތުގެ ދަށުން ފަތުރުވެރިކަމުގެ ސިނާއަތަށް ބޭނުންވާ އިތުރު ވަސީލަތްތައް ގާއިމުކޮށްދޭނެ ކަމަށެވެ.
މި އަމާޒަށް ވާސިލްވުމަށްޓަކައި އައު ރިސޯޓުތައް ހުޅުވުމާއި ފަތުރުވެރިކަމަށް ބޭނުންވާ އެހެނިހެން އިންފްރާސްޓްރަކްޗާތައް ތަރައްގީކުރުމުގެ މަސައްކަތްތައް ހަލުވިކަމާއެކު ކުރިއަށްދާނެ ކަމަށް ރައީސް ވިދާޅުވިއެވެ. އަދި މި ލަނޑުދަނޑިއަކީ ސަރުކާރާއި ވެރިކަންކުރާ ޕާޓީގެ ސިޔާސަތުތަކުގެ ތެރެއިން ޙަޤީޤަތަކަށް ހަދައިދޭނެ ކަމެއް ކަމަށް އެމަނިކުފާނު ވައުދުވެވަޑައިގެންނެވިއެވެ.
“އަހަރަކު ފަސް މިލިއަން ޓޫރިސްޓުން ރާއްޖެ އަންނަ ވަރަށް ޓޫރިޒަމްގެ ދާއިރާ އިރާދަކުރެއްވިއްޔާ 2033 ހަމައަށް ދާން ވާއިރަށް މި ސަރުކާރުގެ ސިޔާސަތުގެ ތެރެއިން، މި ޕާޓީގެ ސިޔާސަތުގެ ތެރެއިން އިރާދަކުރެއްވިއްޔާ އަޅުގަނޑުމެން ހަގީގަތަކަށް ހަދައިދޭނަން” ރައީސް ވިދާޅުވިއެވެ.
ރާއްޖޭގެ ފަތުރުވެރިކަމުގެ ދާއިރާ އިތުރު ހަރުފަތަކަށް ގެންދިއުމަށްޓަކައި ސަރުކާރުން ވަނީ މުހިންމު ފިޔަވަޅުތަކެއް އަޅަން ފަށާފައެވެ. އެގޮތުން ރާއްޖެއަށް އަންނަ ޓޫރިސްޓުންގެ އަދަދު އިތުރުކުރުމަށް ބައިނަލްއަގުވާމީ މާކެޓުގައި ހަރަކާތްތެރިވުން އިތުރުކޮށް، ވައިގެ މަގުން ގުޅުވާލާ މިންވަރު ފުޅާކުރުމަށް ވަނީ ރޭވިފައެވެ.
ކިޔުންތެރިންގެ ހިޔާލު