ހުޅުމާލޭ ދެވަނަ ފިޔަވަހީގައި ހިނގި ނުރައްކާތެރި އެކްސިޑެންޓެއްގައި ސީރިއަސް އަނިޔާތަކެއް ލިބުނު ކުރީގެ މުދައްރިސް ޅ. ކުރެންދޫ މާޖެހިގެ މުހައްމަދު އަފީފް، ޓްރީޓޮޕް ހޮސްޕިޓަލުގެ އައިސީޔޫގައި ވެންޓިލޭޓަރުގެ އެހީގައި ފަރުވާދެމުން ދަނިކޮށް ނިޔާވެއްޖެއެވެ.
މި އެކްސިޑެންޓް ހިނގާފައިވަނީ ހުޅުމާލޭ ދެވަނަ ފިޔަވަހީގެ ހިޔާ ޓަވަރު ނުވަޔެއްގެ ކައިރީގައި، ހީނާމާ ހިނގުމާއި ދުނބުރިގަސް މަގު ގުޅުނު ހަތަރު އަނގޮޅީގައި ކާރަކާއި ސައިކަލެއް ޖެހިގެންނެވެ. އެ ހާދިސާ ހިނގި ވަގުތު އޭނާ ދަތުރުކުރައްވަމުން ގެންދެވީ ޚާއްސަ އެހީއަށް ބޭނުންވާ އޭނާގެ ދަރިފުޅު ވަޒީފާ އަދާކުރާ މަސްޖިދު އަމީލް ޖަލީލަށް ގޮވައިގެންނެވެ.
އުމުރުން 62 އަހަރުގެ އަފީފް ނިޔާވުމާ ގުޅިގެން، އޭނާގެ ކަށުނަމާދު ބޭއްވުމަށް ހަމަޖެހިފައިވަނީ މެންދުރު ނަމާދަށްފަހު ހުޅުމާލޭ މަސްޖިދު ސައިދު ބިން ސާބިތުގައެވެ.
މުހައްމަދު އަފީފަކީ ތައުލީމީ ދާއިރާގައި ތިރީސް ދެ އަހަރަށްވުރެ ދިގު މުއްދަތެއްގައި ޚިދުމަތް ކުރައްވާފައިވާ ފާހަގަކޮށްލެވޭ ބޭފުޅެކެވެ. އޭނާ ވަނީ ޒުވާން އުމުރުގައި އަމަލީ މައިދާނަށް ނުކުމެވަޑައިގެން، ދިވެހިބަހާއި ދީނިއްޔާތު އަދި ތިމާވެށީގެ އިލްމުގެ މުދައްރިސެއްގެ ގޮތުގައި ޕްރައިމަރީ އަދި ސެކަންޑްރީ ފެންވަރުގައި މާލެއާއި އަތޮޅުތެރޭގެ އެކި ސުކޫލުތަކުގައި ޚިދުމަތް ކުރައްވާފައެވެ.
އޭނާގެ ޚިދުމަތުގެ ދައުރުގައި ޖަމާލުއްދީން ސުކޫލާއި، އަޙްމަދިއްޔާ ސުކޫލާއި، އަމީނިއްޔާ ސުކޫލުގެ އިތުރުން ޅ. އަތޮޅު މަދަރުސާ އާއި، ފަރީދިއްޔާ ސުކޫލު އަދި ޣާޒީ ސުކޫލުގައި އިޚްލާސްތެރިކަމާއެކު މަސައްކަތް ކުރައްވާފައިވެއެވެ. އަދި ދިވެހި ސަގާފަތާއި އަދަބީ ފަންނުތަކުގައި ދަރިވަރުން ތަމްރީނުކޮށް، އެކަންކަން ސުކޫލުތަކުގައި ދިރުވައި އާލާކުރެއްވުމަށް އޭނާ ވަނީ މުހިންމު ދައުރެއް އަދާކުރައްވާފައެވެ.
ކިޔުންތެރިންގެ ހިޔާލު