އަހަރުގެ މިހާތަނަށް ރާއްޖެއަށް 1.5 މިލިޔަން ފަތުރުވެރިން ޒިޔާރަތްކޮށްފައިވާކަމަށް ތަފާސް ހިސާބުތަކުން ދައްކައިފިއެވެ.
ފަތުރުވެރިކަމާބެހޭ ވުޒާރާގެ ތަފާސް ހިސާބުތައް ދައްކާގޮތުގައި މިއީ މިދިޔަ އަހަރުގެ މި މުއްދަތުގައި ރާއްޖެއަށް އައިސްފައިވާ ފަތުރުވެރިންގެ އަދަދާ އަޅާ ބަލާއިރު %3.4 ދަށް އަދަދެކެވެ. މިމަހުގެ ފުރަތަމަ 14 ދުވަސްތެރޭ ރާއްޖެއަށް 60،000އަށްވުރެ ގިނަ ފަތުރުވެރިން ރާއްޖެއަށް އައިސްފައިވާއިރު، މިއީ މިދިޔަ އަހަރުގެ މި މުއްދަތުގައި ރާއްޖެއަށް އައިސްފައިވާ ފަތުރުވެރިންގެ އަދަދާ އަޅާ ބަލާއިރު %1.3 ދަށް އަދަދެކެވެ.
އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ ޗައިނާއިންނެވެ. އެގޮތުން ޗައިނާއިން ރާއްޖެއަށް 278،000އަށްވުރެ ގިނަ ފަތުރުވެރިން ވަނީ ރާއްޖެއަށް އައިސްފައެވެ.
އެންމެ ގިނަ ފަތުރުވެރިން އައިސްފައިވާ ޤައުމުތައް:
- ޗައިނާ: 278,605 ފަތުރުވެރިން
- ރަޝިއާ: 217,889 ފަތުރުވެރިން
- އިނގިރޭސިވިލާތް: 114,735 ފަތުރުވެރިން
- އިޓަލީވިލާތް: 95,164 ފަތުރުވެރިން
- ޖަރުމަނުވިލާތް: 92,284 ފަތުރުވެރިން
ތަފާސްހިސާބުތަކުގައި ވާގޮތުން މިއަހަރުގެ ތެރޭގައި މިހާތަނަށް އެންމެ ގިނަ ފަތުރުވެރިން ޒިރާރަތްކޮށްފައިވަނީ ފެބުރުވަރީ މަހުއެވެ. އެމަހު 254،556 ފަތުރުރުވެރިން ހަމައެކަނި އެމަހު ޒިޔާރަތްކޮށްފައިވެއެވެ. މި މުއްދަތުގައި ރާއްޖެ ޒިޔާރަތްކުރި ފަތުރުވެރިންގެ ތެރެއިން 1,091,228 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. ގެސްޓްހައުސްތަކުގައި 328,203 ފަތުރުވެރިން ޗުއްޓީ ހޭދަކޮށްފައިވާއިރު، ހޮޓާތަކުގައި 34,346 ފަތުރުވެރިން އަދި ސަފާރީ އުޅަނދުތަކުގައި 27,913 ފަތުރުވެރިން ޗުއްޓީ ހޭދަކޮށްފައިވެއެވެ.
އެންމެ ގިނަ ފަތުރުވެރިން ރާއްޖެ އެތެރެވެފައިވަނީ ވައިގެ މަގުންނެވެ. އެގޮތުން 1,497,595 މީހުން ވައިގެ މަގުން އެތެރެވެފައިވެއެވެ. މީގެ ތެރެއިން %97.8 މީހުން އައީ ވެލާނާ އިންޓަނޭޝަނަލް އެއާޕޯޓުންނެވެ. އެއީ 1,480,394 މީހުންނެވެ. މީގެ އިތުރުން ގަން އިންޓަނޭޝަނަލް އެއާޕޯޓުން 5,252 މީހުން، މާފަރު އިންޓަނޭޝަނަލް އެއާޕޯޓުން 4,791 މީހުން، ހަނިމާދޫ އިންޓަނޭޝަނަލް އެއާޕޯޓުން 3,171 މީހުން، މާމިގިލީ އެއާޕޯޓުން 2,783 މީހުން އަދި ދާލު އެއާޕޯޓުން 1,203 މީހުން އެތެރެވިއެވެ.
ކިޔުންތެރިންގެ ހިޔާލު