ސަރުކާރުން އަލަށް އުފެއްދެވި ޤައުމީ ވަޤުފު ކުންފުނީގެ ސަބަބުން ރާއްޖޭގެ ދީނީ ކަންކަމަށް އައު ރޫޙަކާއި ދިރުމެއް ލިބިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދިވެހިރާއްޖެ އިސްލާމް ދީނުގެ ހިދާޔަތް ލިބިގަތްތާ 900 އަހަރު ފުރުމުގެ މުނާސަބަތުގައި ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.
ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ ވަޤުފަކީ އިސްލާމީ ފިޤުހުގައި ނުހަނު މަތިވެރި މަޤާމެއް ދެވިފައިވާ ކަމެއް ކަމަށާއި މިއީ އިންސާނިއްޔަތަށް ފައިދާހުރި އެތައް ކަމެއް އެކުލެވޭ ނިއުމަތެއް ކަމަށެވެ. މީގެއިތުރުން ވަޤުފުގެ ނިޒާމަކީ އިޤްތިޞާދަށް ވަރުގަދަ ބާރެއް ލިއްބައިދީ މުޖުތަމަޢުގެ ފަރުދުންނަށް އޭގެ ހެޔޮ މަންފާ ފޯރުކޮށްދިނުމުގެ އެންމެ ވަރުގަދަ ތަނބު ކަމުގައިވެސް އެމަނިކުފާނު ފާހަގަކުރެއްވިއެވެ.
އިސްލާމީ ތާރީޚުގެ އަލީގައި މި ނިޒާމުގެ މުހިންމުކަން ހާމަކުރައްވަމުން ރައީސް ވިދާޅުވީ ތާރީޚުގައިވެސް އެކި ރޮނގުތަކުން ގާބިލު މީހުން ބިނާކުރުމަށާއި މުޖުތަމަޢުގެ ދިރިއުޅުމުގެ ހާލަތު ރަނގަޅުކުރުމަށް ވަޤުފުން ވަރަށް ބޮޑު އެހީތެރިކަމެއް ފޯރުކޮށްދީފައިވާ ކަމަށެވެ. އެގޮތުން ފިކުރީ އުފެއްދުންތެރިކަމާއި މިސްކިތްތަކާއި ލައިބްރަރީތަކާއި އިސްލާމީ މަރުކަޒުތައް ބިނާކުރުމުގައި ވަޤުފުގެ ދައުރު ބޮޑުކަން އެމަނިކުފާނު ފާހަގަކުރެއްވިއެވެ.
ރާއްޖޭގެ އިސްލާމީ ވެށި ހަރުދަނާކުރުމަށްޓަކައި ދީނީ ކަންކަމަށް ކުރެވޭ ޚަރަދުތައް އިތުރުކުރަން ސަރުކާރުން އަބަދުވެސް އިސްކަންދޭނެ ކަމަށް ރައީސް މުޢިއްޒު ވިދާޅުވިއެވެ. ޒަމާނާ އެއްގޮތަށް މިސްކިތްތައް ބިނާކުރުމާއި ޝަރުޢީ ހަމަތަކުގެ މަތިން ހިންގޭ ވިޔަފާރީގެ ދާއިރާތައް އިތުރަށް ފުޅާކުރުމަކީ ސަރުކާރުގެ ޚާއްޞަ ތަސައްވުރެއް ކަމުގައި އެމަނިކުފާނު ވިދާޅުވިއެވެ.
އަލަށް އުފެއްދެވި “މޯލްޑިވްސް އައުޤާފް އިންވެސްޓްމަންޓްސް ލިމިޓެޑް” އަކީ ސަރުކާރުގެ ސައްތައިންސައްތަ ހިއްސާވާ ކުންފުންޏެކެވެ. މި ކުންފުނީގެ މައިގަނޑު މަގްސަދަކީ ރާއްޖޭގެ އެކި ކަންކޮޅުތަކުގައި މިސްކިތްތައް ބިނާކުރުމާއި އެ ތަންތަން މަރާމާތުކޮށް ބެލެހެއްޓުމުގެ އިތުރުން އާމްދަނީ ލިބޭނެ ފަދަ ވަޤުފު އިމާރާތްތަކާއި ވިޔަފާރި މަޝްރޫއުތައް ތަރައްގީކޮށް ހިންގުމެވެ.
ކިޔުންތެރިންގެ ހިޔާލު