އިނގިރޭސި ޕްރިމިއާ ލީގުގައި ރޭ އެވަޓަންއިން ފަހު ވަގުތު ލަނޑު ޖަހައި 2-2 އިން މެންޗެސްޓާ ޔުނައިޓެޑާ އެއްވަރުކޮށްފިއެވެ.
އެވަޓަންގެ ހިލް ޑިކިންސަން ދަނޑުގައި ކުޅުނު މި މެޗު އެއްވަރުވެފައިވަނީ މެޗުގެ ފަހު މިނިޓުގައި އެވަޓަންގެ މެއިޓްލޭންޑް ނައިލްސް ކާމިޔާބުކޮށްދިން ލަނޑުންނެވެ.
ދާދި ހަމަހަމަ ކުޅުމެއް ފެނިގެންގޮސްފައިވާ މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް ދެ ޓީމަށްވެސް ވަނީ ލަނޑު ޖަހާނެ ރަގަޅު ފުރުސަތުތަކެއް ލިބިފައެވެ. މެންޗެސްޓަރ ޔުނައިޓެޑުން މި މެޗުގައި ފުރަތަމަ ލަނޑު ޖަހާ ކުރި ހޯދާފައިވަނީ ދެވަނަ ހާފުގެ ކުޅުން ފެށުނުތާ ފުރަތަމަ މިނިޓުގައި ބްރަޔަން އެމްބެއުމޯ ކާމިޔާބުކޮށްދިން ލަނޑުންނެވެ. އެވަޓަންއިން މި މެޗުގެ ނަތީޖާ ފުރަތަމަ ފަހަރަށް އެއްވަރުކޮށްފައިވަނީ މެޗުގެ 83 ވަނަ މިނިޓުގައި ތައިރިގް ޖޯޖް ކާމިޔާބުކޮށްދިން ލަނޑުންނެވެ.
މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް އަރިމަތިން ލީކް ޝޯ ނަގައިދިން ހުރަހެއް ބޮލުން ޖަހާ ގޯލުގެ ތެރެއަށް ފޮނުވާލައިގެން ބެންޖަމިން ސެސްކޯ ވަނީ ލަނޑެއް ޖަހާ ޔުނައިޓެޑަށް ދެވަނަ ފަހަރަށް ކުރި ހޯދަދީފައެވެ. އެވަޓަން އިން މި މެޗުގައި ޕޮއިންޓެއް ހޯދާފައިވަނީ މެޗުގެ އިތުރު ވަގުތުގެ ކުޅުމުގެ ގޮތުގައި ދެއްކި ފަސް މިނިޓުގެ ތެރެއިން ފަހު މިނިޓުގައި މެއިޓްލޭންޑް ނައިލްސް ކާމިޔާބުކޮށްދިން ލަނޑުންނެވެ.
މިމެޗުން އެއްވަރުވެ، ޔުނައިޓެޑަށް ލީގުގެ ފުރަތަމަ ތިން މެޗުން ލިބިފައިވަނީ ހަތަރު ޕޮއިންޓެވެ.
އެވަޓަންވެސް މި ސީޒަނުގައި މެޗަކުން އަދި ބަލިވެފައިނުވެއެވެ. ލީގުގައި ދެ މެޗުން އެއްވަރުވެ، އެއް މެޗުން އެވަޓަން ވަނީ މޮޅުވެފައެވެ.
ކިޔުންތެރިންގެ ހިޔާލު