އިސްލާމީ ކަންތައްތަކާއި އައުޤާފާ ބެހޭ ވުޒާރާއިން އިންތިޒާމުކޮށްގެން ބާއްވާ “ޖަމްޢިއްޔާތަކުގެ އަހަރީ ބައްދަލުވުން 2026″ ގައި ބައިވެރިވުމުގެ ފުރުސަތު، ރާއްޖޭގެ އެކި ކަންކޮޅުތަކުގައި ހަރަކާތްތެރިވާ ދީނީ ދައުވަތުގެ ހަރަކާތްތައް ހިންގާ ޖަމްޢިއްޔާތަކަށް ހުޅުވާލައިފިއެވެ.
އިސްލާމީ ކަންތަައްތަކާއި ބެހޭ ވުޒާރާއިން ބުނީ، މި މަހާސިންތާ ބޭއްވުމަށް ހަމަޖެހިފައިވަނީ ސެޕްޓެމްބަރު 26، 2026 ވާ ހޮނިހިރު ދުވަހު، އިސްލާމީ މަރުކަޒުގެ ޖަލްސާކުރާ މާލަމުގައި ކަމަށެވެ.
“21 ވަނަ ޤަރުނުގައި އިސްލާމީ ދަޢުވަތު” މި ޝިއާރުގެ ދަށުން ކުރިއަށްގެންދާ މި މަހާސިންތާގެ މައިގަނޑު މަޤްސަދަކީ، ރާއްޖޭގެ ދީނީ އަދި އިޖުތިމާޢީ ދާއިރާގައި ދީނީ ދައުވަތު ފެތުރުމުގެ މަސައްކަތްކުރާ ޖަމްޢިއްޔާތަކުގެ މެދުގައި ގުޅުން ބަދަހިކޮށް، އެ ޖަމްޢިއްޔާތަކުން ކުރަމުންދާ މަސައްކަތްތައް އިތުރަށް ހަރުދަނާކުރުން ކަމަށް އިސްލާމީ ކަންތައްތަކާއި ބޭހޭ ވުޒާރާއިން ބުނެފައިވެއެވެ. މީގެއިތުރުން، ޒަމާނާ އެއްގޮތަށް ދައުވަތުގެ މައިދާން ފުޅާކުރުމަށް އެހީތެރިވެދިނުމަކީވެސް މި ބައްދަލުވުމުގެ މުހިންމު ބޭނުމެއް ކަމަށް އެ ވުޒާރާއިން މައުލޫމާތު ދީފައިވެއެވެ.
އިސްލާމީ ކަންތައްތަކާއި އައުޤާފާ ބެހޭ ވުޒާރާއިން އިތުރަށް ބުނީ، މި ބައްދަލުވުމުގައި ބައިވެރިވާން އެދޭ ޖަމްޢިއްޔާތަކަށް ހާއްސަ އޮންލައިން ފޯމެއް މެދުވެރިކޮށް ރަޖިސްޓްރީވުމުގެ އިންތިޒާމު މިހާރު ހަމަޖައްސާފައިވާ ކަމަށެވެ. އަދި ބައިވެރިވުމަށް އެދި ފޯމު ހުށަހެޅުމުގެ އެންމެ ފަހު ތާރީޚަކީ ސެޕްޓެންބަރު 10 ވާ ބުރާސްފަތި ދުވަސް ކަމަށެވެ.
މި ބައްދަލުވުމަކީ މުޅި ރާއްޖޭގެ ޖަމްޢިއްޔާތައް އެއް މަންސައަކުން ބައްދަލުވެ، ގައުމުގެ ދީނީ އަދި އިޖުތިމާއީ ފޭރާން ވަރުގަދަކުރުމަށް މަޝްވަރާކޮށް ހިޔާލު ބަދަލުކުރުމަށް ލިބިގެންދާނެ އަގުހުރި ފުރުސަތެއް ކަމަށް އެ ވުޒާރާއިން ފާހަގަ ކޮށްފައިވެއެވެ.
ކިޔުންތެރިންގެ ހިޔާލު