ދ. ކުޑަހުވަދޫ ބަނދަރު ތަރައްޤީ ކުރުމުގެ މަޝްރޫޢުގެ ދަށުން އެއްގަމުތޮށި ލުމަށް ބޭނުންވާ ކޮންކްރީޓް ބްލޮކް އަތުރައި ފުރިހަމަކުރުމުގެ މަސައްކަތުގެ 75 އިންސައްތަ ނިމިފައިވާ ކަމަށް އެމްޓީސީސީ އިން ބުނެފިއެވެ.
މި މަޝްރޫޢުގެ އެއްބަސްވުމުގައި އެމްޓީސީސީ އާއި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއާއެކު ސޮއިކޮށްފައިވަނީ 14 އޯގަސްޓު 2023 ގައެވެ. ނަމަވެސް، މި މަސައްކަތް ޢަމަލީގޮތުން ނުފެށި ގިނަ ދުވަސްތަކެއް ވަނީ ހޭދަވެގެން ގޮސްފައެވެ.
ކުޑަހުވަދޫ ބަނދަރު އިތުރަށް ތަރައްޤީކުރުމަށް ހިންގާ މި މަޝްރޫޢުގެ ތެރެއިން އެ ރަށުގެ އުތުރުފަރާތު ބަނދަރުގައި 176 މީޓަރުގެ ބޭރުތޮށި ލުމުގެ މަސައްކަތް ކުރިއަށްދާނެއެވެ. އަދި ބޮޑުހިލައިގެ ބޭރުތޮށި 312 މީޓަރަށް އިތުރުކުރުމުގެ އިތުރުން 90 މީޓަރުގެ ކޮންކްރީޓް ޖެޓީއެއް ހެދުންވެސް މި މަޝްރޫޢުގައި ހިމެނެއެވެ.
މީގެއިތުރުން، މި މަޝްރޫޢުގެ ދަށުން ބަނދަރުގައި ފައްތިޔާ ގާއިމުކުރުމާއި ބޭރުތޮއްޓަށް އެރޭނެގޮތަށް ކޮންކްރީޓް ބްރިޖެއް ހެދުމުގެ މަސައްކަތް ކުރިއަށްދާނެއެވެ.
ދާލު އަތޮޅުގެ ވެރިކަން ކުރާ ކުޑަހުވަދޫއަކީ މަސްވެރި ރަށެއްގެ އިތުރުން ބޭސްފަރުވާ އާއި އެނޫންވެސް އެކި ބޭނުންތަކަށް ގިނަ އަދަދެއްގެ ބަޔަކު ޒިޔާރަތްކުރާ ރަށެކެވެ. އެހެންކަމުން، އެ ރަށުގެ ބަނދަރަކީ ގިނަ އަދަދަކަށް ކަންނެލި އޮޑިފަހަރާއި ލޯންޗު އަދި ޑިންގީތައް އަޅާ ބާރުބޮޑު ބަނދަރެކެވެ.
މިހާރު އެ ރަށުގައި ބޭނުންކުރަމުންދާ ބަނދަރުގެ ޖާގައިގެ ދަތިކަން ބޮޑުވުމުގެ ސަބަބުން އުޅަނދުފަހަރަށް ގިނަ ގޮންޖެހުންތަކަކާ ވަނީ ކުރިމަތިވެފައެވެ. އެހެންކަމުން، ބަނދަރު ބޮޑުކޮށް ތަރައްޤީކުރުމަކީ މުޅި ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް އެޅިގެންދާނެ މުހިންމު ފިޔަވަޅެކެވެ.
ކިޔުންތެރިންގެ ހިޔާލު