އިސްތިއުމާރީ ދައުލަތުގެ ބޮޑުވަޒީރު މުޖުރިމު ނަތަންޔާހޫއަކީ މުޅި އިންސާނިއްޔަތުގެވެސް ދުޝްމަނެއް ކަމަށް ތުރުކީގެ ޚާރިޖީ ވަޒީރު ހަކާން ފީދާން ވިދާޅުވެއްޖެއެވެ.
ތުރުކީގެ ޚާރިޖީ ވަޒީރު މިފަދައިން ވިދާޅުވީ، އިސްތަމްބޫލްގައި މިއަދު ބޭއްވި މައްކާ ޖޮއިންޓް ޑިފެންސް އެގްރީމެންޓްގެ ކޮމިޓީ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ތުރުކީގެ ޚާރިޖީ ވަޒީރު ހަކާން ފީދާން ވިދާޅުވީ، ފަލަސްތީނު ރައްޔިތުންނާއި، މުސްލިމުންގެ ލޭ އޮހޮރުވައި އެކަމަށް އުފާކުރާ ބޮޑު މުޖުރިމު ނަތަންޔާހޫ ހުއްޓުވަންޖެހޭ ކަމަށެވެ.
ޣައްޒާގައި ހިންގަމުންގެންދާ ނަސްލުނައްތާލުމުގެ ޖަރީމާތަކާއެކު މުޖުރިމު ނަތަންޔާހޫ މިހާރު ވެފައިވަނީ މުޅި އިންސާނިއްޔަތުގެވެސް ދުޝްމަނަކަށް ކަމަށް ތުރުކީގެ ޚާރިޖީ ވަޒީރު ވިދާޅުވިއެވެ. އެހެންކަމުން، އޭނާގެ ފަރާތުން ދުނިޔެއަށް ކުރިމަތިވަމުންދާ ނުރައްކާތަކާ ދެކޮޅަށް ދުނިޔޭގެ ނިޒާމުތަކުން މަސައްކަތް ކުރަންޖެހޭ ކަމަށް ވިދާޅުވިއެވެ.
ނަތަންޔާހޫ ގެންގުޅޭ ސިޔާސަތުތަކުގެ ސަބަބުން އިސްރާއީލާއި، ފަލަސްތީނާއި އަދި މުޅި ސަރަހައްދަށް ވެސް އިންތިހާއަށް ގެއްލުން ލިބެމުންދާ ކަމަށް ހަކަން ފީދާން ވިދާޅުވިއެވެ.
ފަލަސްތީނުގެ މިނިވަން ދައުލަތެއް ގާއިމުކުރަން އޭނާ ބޭނުން ނުވާކަން ވަރަށް ސާފު ކަމަށާއި، މުޅި ސަރަހައްދުގެ ގައުމުތައް ހިސާރުކުރަމުންދާ ދިއުން ދޫކޮށްލަންވެސް ނަތަންޔާހޫ ބޭނުން ނުވާކަމަށާއި، އޭނާ ބޭނުންވަނީ ނަސްލު ނައްތާލުމާއި، ގައުމުތައް ހިސާރުކުރުމުގެ އުސޫލު ކުރިއަށް ގެންދިއުމަށް ކަމަށްވެސް ތުރުކީގެ ޚާރިޖީ ވަޒީރު ވިދާޅުވިއެވެ.
ކިޔުންތެރިންގެ ހިޔާލު