ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އިން ކުރިއަށްގެންދާ 11 ވަނަ އިންޓަރނޭޝަނަލް ކޮންފަރެންސް އޮން އިންޓެލެކްޗުއަލް އެޑްވާންސްމަންޓް (އައިސީއައިއޭ) ފެށުމުގެ ރަސްމިއްޔާތުގައި ވާހަކަފުޅުދައްކަވަމުން، މިއަހަރުން ފެށިގެން ކޮންމެ އަހަރަކުވެސް އެ ކޮންފަރެންސަށް އިސްލާމީ ކަންތައްތަކާ ބެހޭ ވުޒާރާގެ ފަރާތުން ސްޕޮންސަރޝިޕް ދެއްވާނެކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ވަޒީރު ވިދާޅުވީ، މިއީ އައިޔޫއެމް ރިސަރޗް ސެންޓަރުން ކުރަމުންދާ ބުރަ މަސައްކަތަށް ހިތްވަރު ދިނުމުގެ ގޮތުން ދެއްވާ އެހީތެރިކަމެއް ކަމަށެވެ. އަދި ޔުނިވަރސިޓީގެ މަޤްޞަދަކީ ހަމައެކަނި ކިޔަވައިދިނުން ނޫން ކަމަށާއި، މުޖުތަމަޢަށް ޚިދުމަތްކުރުމާއި ޢިލްމީ އައު ހޯދުންތަކާއި ދިރާސާތައް ދެމެހެއްޓެނިވި ގޮތެއްގައި ކުރިއަށްގެންދިއުން ކަމަށްވެސް އެމަނިކުފާނު ފާހަގަކުރެއްވިއެވެ.
ވާހަކަފުޅު ކުރިއަށްގެންދަވަމުން ވަޒީރު ފާހަގަކުރެއްވީ، ޢިލްމީގޮތުން މުޖުތަމަޢު ބިނާކުރުމަކީ މަތިވެރި ވާޖިބެއް ކަމަށެވެ. އަދި ﷲ ތަޢާލާ އިންސާނާ އުފައްދަވައި ބިންމަތީގައި ޚަލީފާވެރިކުރެއްވީ ޢިލްމުވެރިކަމާއެކު ކަމަށާއި، ޢިލްމަކީ ނަބީބޭކަލުންގެ ތަރިކަ ކަމުގައި ލައްވާފައިވާކަން އެމަނިކުފާނު ހަނދާންކޮށްދެއްވިއެވެ.
2016 ވަނަ އަހަރުން ފެށިގެން ބާއްވަމުން އަންނަ އައިސީއައިއޭ ކޮންފަރެންސް މިއަދުން ފެށިގެން މާދަމާގެ ނިޔަލަށް ކުރިއަށްދާނެއެވެ. މިއީ ޢިލްމީ މަޢުލޫމާތު ބަދަލުކުރުމާއި ދިރާސީ މަސައްކަތްތައް އިތުރުކުރުމަށް ފުޅާ ފުރުޞަތުތަކެއް ހުޅުވާލަދޭ މުހިންމު ބައިނަލްއަޤުވާމީ ޕްލެޓްފޯމެކެވެ.
ކިޔުންތެރިންގެ ހިޔާލު