އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) ގެ ދެވަނަ ޓާމުގައި ތަފާތު ދާއިރާތަކުން 67 ކޯހަކަށް ވަނުމުގެ ފުރުޞަތު ހުޅުވާލައިފިއެވެ. މީގެތެރޭގައި ޤުރުއާނާއި، ޝަރީޢާ، ފިޤުހު، އިސްލާމިކް ސްޓަޑީސް، ފައިނޭންސް، މެނޭޖްމެންޓް އަދި ޖާނަލިޒަމް ފަދަ ދާއިރާތައް ހިމެނެއެވެ. ލެވެލްތަކަށް ބަލާއިރު ޕީއެޗްޑީގެ 1 ކޯހާއި، މާސްޓާސްގެ 15 ކޯހާއި، ބެޗެލާސްގެ 16 ކޯހުގެ އިތުރުން ޕޯސްޓް ޑިޕްލޮމާ، އެސޯސިއޭޓް ޑިގްރީ، ޑިޕްލޮމާ އަދި ސެޓްފިކެޓް ލެވެލްގެ ގިނަ ކޯސްތަކެއް ހިމެނެއެވެ.
ކުއްލިއްޔާ އޮފް އެޑިއުކޭޝަންގެ ޑީން ޑރ. ޢާއިޝަތު ޝީނާ ވިދާޅުވީ، މިއީ އޭލެވެލް ނިންމި ކުދިންނަށް ވެސް އަމިއްލަ ރަށުގައި ތިބެގެން ކިޔަވަން ލިބޭ ރަނގަޅު ފުރުޞަތެއް ކަމަށެވެ. މައި ކެމްޕަހުގެ އިތުރުން ރ. އުނގޫފާރު، ޅ. ނައިފަރު، ލ. ފޮނަދޫ، ތިނަދޫ ސިޓީ، ފުވައްމުލައް ސިޓީ، އަދި އައްޑޫ ސިޓީގެ މީދޫ އާއި މަރަދޫފޭދޫ ކެމްޕަހުގައި ކްލާސްތައް ކުރިއަށްދާނެއެވެ. ކެމްޕަސްތަކަށް ހާޒިރުވެގެންނާއި، ވާޗުއަލްކޮށް އަދި އޮންލައިންކޮށް ވެސް ކިޔަވައިދޭނެއެވެ.
މިފަހަރުގެ ކޯސްތަކުގެ ތެރެއިން އެޑިއުކޭޝަން މިނިސްޓްރީއާ ގުޅިގެން ހިންގާ “ޑިޕްލޮމާ އިން ސްޕެޝަލް އެޑިއުކޭޝަން” އަކީ ޓީޗަރުން ހޯދަން ދަތި ދާއިރާއަކަށް ވުމުން ވަރަށް މުހިންމު ކޯހެއްކަން ޑރ. ޝީނާ ފާހަގަކުރެއްވިއެވެ. ހަމައެހެންމެ، ސެންޓަރ ފޮރ ރިސާރޗްގެ އެސިސްޓެންޓް ޕްރޮފެސަރ ޑރ. މުހައްމަދު ޞާލިހް ވަނީ އިސްލާމީ އުސޫލުތަކާ އެއްގޮތަށް ކައުންސެލިންގ ދޭން ދަސްކޮށްދޭ “ސެޓްފިކެޓް 4 އިން ސްޕިރިޗުއަލް އިންޓަލިޖެންސް ކައުންސެލިންގ” ކޯހުގެ މުހިންމުކަން ވެސް ފާހަގަކުރައްވާފައެވެ.
ކޯސްތަކުގެ ޝަރުތުތަކާއި ފޯމު އައިޔޫއެމްގެ ޕޯޓަލްއިން ލިބޭނެއެވެ. އިތުރު މަޢުލޫމާތު ޔުނިވަރސިޓީގެ ހޮޓްލައިން 1405 ނުވަތަ 7923247 އަށް ވައިބާ/ވަޓްސްއެޕް މެސެޖެއް ކޮށްގެން ހޯދޭނެއެވެ.
ކިޔުންތެރިންގެ ހިޔާލު