އިސްތިއުމާރީ ސިފައިން ޣައްޒާގެ އެކި ހިސާބުތަކަށް ދެމުންގެންދާ އުދުވާނީ ހަމަލާތަކުގައި ވޭތުވެދިޔަ 48 ގަޑިއިރުގެ ތެރޭގައި 9 މީހުން ޝަހީދު ކޮށްލައިފިއެވެ.
މި ހަމަލާތަކުގައި 18 މީހުން ޒަޚަމްވެފައިވާ ކަމަށް، ޣައްޒާ ހެލްތު މިނިސްޓްރީން ބުނެއެވެ.
ހަމަލާތައް ހުއްޓާލުމަށް ވެފައިވާ އެއްބަސްވުމާ ޚިލާފްވެ އިސްތިއުމާރީ ސިފައިން ކެނޑިނޭޅި ކޮންމެ ދުވަހަކު ގެންދަނީ ޣައްޒާގެ އެކި ހިސާބުތަކަށް ހަމަލާތައް ދެމުންނެވެ. އަސްކަރީ ޖެޓުތަކާއި، ޑްރޯންތައް ބޭނުންކޮށްގެން މިސައިލާއި ބޮމުން ހަމަލާތައް ދެމުން ގެންދާއިރު، އެއްގަމުން ބޮޑުބަޑީގެ ހަމަލާތައް އަދި ބަޑި ޖަހައިގެންވެސް މީހުން ޝަހީދު ކުރަމުން ގެންދެއެވެ.
މީގެއިތުރުން، ބުލްޑޯޒަރު ވައްދައިގެން ޣައްޒާގެ އެކި އަވަށްތަކުގެ ގެތަކާއި އިމާރާތްތައް ތަޅައި ގެންދަނީ ބިމާހަމަކުރަމުންނެވެ.
2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން އިސްތިއުމާރީ ސިފައިން ޣައްޒާގެ އާންމުންނާ ދެކޮޅަށް ކުރަމުންގެންދާ ހަނގުރާމައިގައި މިހާތަނަށް 73،449 މީހުން ޝަހީދުކޮށްލާފައި ވާއިރު، ޒަޚަމްވިކަމަށް ރެކޯޑް ކުރެވުނު މީހުންގެ އަދަދު 174،472 އަށް އަރާފައި ވެއެވެ.
ހަމަލާތައް ހުއްޓާލަން ވެވުނު އެއްބަސްވުމަށް މިދިޔަ އަހަރުގެ އޮކްޓޫބަރުމަހުގެ 10 ވަނަ ދުވަހު އަމަލުކުރަން ފެށިފަހުން އެކަނިވެސް ޣައްޒާއިން މިހާތަނަށް 1،313 މީހުން ޝަހީދުކޮށްލާފައި ވެއެވެ. އޭގެތެރޭގައި 300 ކުޑަކުދިން ހިމެނެއެވެ.
އިސްތިއުމާރީ ޓެރަރިސްޓުން ހަމަލާދީ ގިނައިން ޝަހީދުކޮށްލާފައި ވަނީ، ޣައްޒާގެ ތުއްތު ކުދިންނާއި، ކުޑަކުދިންނާއި، އަންހެނުންނާއި، އުމުރުން ދުވަސްވީ މީހުންނެވެ.
މިއީ، ޣައްޒާގެ ނަސްލު މުޅިން ނެތިކޮށްލުމަށް ހިންގާ ޖަރީމާތަކެއް ކަމަށް އދގެ މިނިވަން ތަހްގީގުތަކުން ސާބިތުވެފައި ވާއިރުވެސް އަދި މުޅި ދުނިޔެއިން އެވާހަކަ ދައްކަމުން ގެންދާއިރުވެސް، އެމެރިކާއާއި ހުޅަނގުގެ ގައުމުތަކުން ގެންދަނީ މިޖަރީމާތައް ހިންގުމަށް ޒަޔަނިސްޓުންނަށް އެހީވެދީ، ހިތްވަރުދީ ތާއީދު ދެމުންނެވެ.
ކިޔުންތެރިންގެ ހިޔާލު