ޓޫރިޒަމް ޓްރަސްޓް ފަންޑުގައި ހަތަރުމަހުން 149 މިލިޔަނަށްވުރެ ގިނަ ރުފިޔާ ރައްކާކުރެވިފައިވާކަމަށް، 30 ސެޕްޓެމްބަރ 2025 އިން 31 ޑިސެމްބަރ 2025 ގެ ނިޔަލަށް ތައްޔާރުކޮށްފައިވާ މޯލްޑިވްސް ޓުއަރިޒަމް ޓްރަސްޓް ފަންޑުގެ އަހަރީ މާލީ ބަޔާންތަކުގެ އޮޑިޓް ރިޕޯޓުން ދައްކައިފިއެވެ.
އެގޮތުން 2025 ވަނަ އަހަރުގެ ޓޫރިޒަމް ޓްރަސްޓް ފަންޑުގެ މާލީ ބަޔާނުން ދައްކާގޮތުން އެ އަހަރުގެ ސެޕްޓެމްބަރު މަހުގެ 30 އިން ޑިސެމްބަރު މަހުގެ ނިޔަލަށް މި ފަންޑަށް ލިބުނު ފައިސާގެ ޖުމްލަ އަދަދަކީ 157،827،372 (ސަތޭކަ ފަންސާސް ހަތް މިލިއަން އަށް ލައްކަ ހަތާވީސް ހާސް ތިން ސަތޭކަ ހަތްދިހަ ދެ) ރުފިޔާއެވެ. އަދި މި ފަންޑުން 8،571،150 (އަށް މިލިއަން ފަސް ލައްކަ ހަތްދިހަ އެއްހާސް ސަތޭކަ ފަންސާސް) ރުފިޔާ ވަނީ ހަރަދުކޮށްފައެވެ. އެހެންކަމުން 2025ވަނަ އަހަރު ނިމުނުއިރު މި ފަންޑުގައި މުޅި ޖުމްލަ 149،256،222 (ސަތޭކަ ސާޅީސް ނުވަ މިލިއަން ދެ ލައްކަ ފަންސާސް ހަ ހާސް ދުއި ސައްތަ ބާވީސް) ރުފިޔާ ހުރިކަމަށް މި ރިޕޯޓުން ދައްކައެވެ.
ދިވެހިރާއްޖޭގެ ޓޫރިޒަމާ ބެހޭ ގާނޫނުގެ ދަށުން، ޓޫރިޒަމް ޓްރަސްޓް ފަންޑެއް އުފައްދައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގުކުރައްވާފައިވަނީ މިދިޔަ އަހަރުގެ މާޗް މަހުގެ 19 ވަނަ ދުވަހުއެވެ.
ޓޫރިޒަމް ޓްރަސްޓް ފަންޑުގެ މައިގަނޑު މަގުސަދަކީ، ފަތުރުވެރިކަމުގެ ދާއިރާ ތަރައްގީކޮށް ކުރިއެރުވުމަށް ބޭނުންވާ އެހީތެރިކަން ފަސޭހަކަމާއެކު ފޯރުކޮށްދީ، ރައްޔިތުންނަށް ދެމެހެއްޓެނިވި މަންފާ ހޯދައިދިނުމެވެ. އެގޮތުން ފަންޑު ގާއިމުކުރުމުގެ އެންމެ ބޮޑު ބޭނުމަކީ ހާމަކަން ބޮޑު ދެފުށް ފެންނަ ސިޔާސަތެއްގެ ދަށުން ފަތުރުވެރިކަމުގެ ދާއިރާއަށް ބޭނުންވާ މާލީ އެހީތެރިކަން ފަސޭހަކަމާއެކު ފޯރުކޮށްދިނުމެވެ.
މިއީ ރާއްޖޭގެ ފަތުރުވެރިކަން އިތުރަށް ތަރައްގީކޮށް، ރާއްޖޭގެ ފަތުރުވެރިކަމުގެ ސިނާއަތުގެ ފެންވަރު ދަމަހައްޓައި، އެ ސިނާއަތުގެ ފައިދާ ދެމެހެއްޓެނިވި ގޮތެއްގައި ލިބޭނެ ގޮތް މަގުފަހިކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން އެޅި ވަރަށް މުހިންމު ފިޔަވަޅެކެވެ.
ކިޔުންތެރިންގެ ހިޔާލު