އއ. ތޮއްޑޫގައި ތަރައްޤީ ކުރަމުންދާ ފުޓްބޯޅަ ދަނޑުގެ މަސައްކަތްތަކުގެ ތެރެއިން، ދަނޑުގައި ލައިޓް ޕޯލް ހަރުކުރުމުގެ މަސައްކަތް މިހާރު ދަނީ ކުރަމުންނެވެ.
މި މަޝްރޫޢަކީ ތޮއްޑޫގެ ކުޅިވަރު ވަސީލަތްތައް ތަރައްޤީކޮށް، ދަނޑުގައި ރޭގަނޑުވެސް ކުޅެވޭނެ އިންތިޒާމު ހަމަޖެއްސުމަށް ކުރިއަށްގެންދާ މަސައްކަތެކެވެ.
މީގެކުރިން މި މަޝްރޫޢުގެ ދަށުން ވަނީ ދަނޑުގެ ވަށާފާރު ރޭނުމާއި ފެންސް ޖެހުމުގެ މަސައްކަތް މުޅިން ނިންމާފައެވެ. އިނާ އިންވެސްޓްމެންޓާ ހަވާލުކޮށްގެން ކުރިއަށްގެންދިޔަ އެ މަސައްކަތް ހަވާލުކުރީ 2022 ވަނަ އަހަރުގެ ނޮވެމްބަރު މަހުގެ 10 ވަނަ ދުވަހުއެވެ. އެ މަސައްކަތުގެ ޖުމްލަ އަގަކީ 1,300,000 ރުފިޔާއެވެ.
އޭގެ އިތުރުން، ތޮއްޑޫ ފުޓްބޯޅަ ދަނޑުގައި ޓާފް އަޅައި، އިންސްޓޯލް ކުރުމުގެ މަސައްކަތްވެސް މިހާރު ވަނީ ނިންމާފައެވެ. އަމީން ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދިޔަ މި މަސައްކަތް ހަވާލުކުރީ 2022 ވަނަ އަހަރުގެ މާރިޗު މަހުގެ 10 ވަނަ ދުވަހުއެވެ. މި މަސައްކަތުގެ ޖުމްލަ އަގަކީ 4,551,961 ރުފިޔާއެވެ.
ދަނޑުގައި ލައިޓް ޕޯލްތައް ހަރުކޮށް ނިމުމާއެކު، ތޮއްޑޫގެ ކުޅުންތެރިންނަށް އެންމެ ޒަމާނީ ފެންވަރުގެ ފުޓްބޯޅަ ދަނޑެއްގެ ޚިދުމަތް ލިބިގެންދާނެއެވެ.
ކިޔުންތެރިންގެ ހިޔާލު