ކ. ހުރާ ކައުންސިލާ ގުޅިގެން ދިވެހިރާއްޖޭގެ ޒަކާތު ހައުސްއިން، ޒަކާތާ ގުޅޭގޮތުން ހޭލުންތެރިކަން އިތުރުކުރުމުގެ ހާއްސަ ޕްރޮގްރާމްތަކެއް އިއްޔެ އެ ރަށުގައި ކުރިއަށް ގެންގޮސްފިއެވެ.
ޒަކާތު ހައުސްއިން މައުލޫމާތު ދިން ގޮތުގައި، މި ޕްރޮގްރާމުގެ ދަށުން، އެ ރަށުގެ އާންމު ރައްޔިތުންނަށް ހާއްސަކޮށްގެން މައުލޫމާތު ދިނުމުގެ ސެޝަނެއް ބާއްވާފައިވެއެވެ. މި ސެޝަނުގައި އިސްލާމްދީނުގައި، ހާއްސަކޮށް މުދަލު ޒަކާތަށް ދެއްވާފައިވާ އަހަންމިއްޔަތާއި ޒަކާތުގެ ޝަރުޢީ ޙުކުމްތަކުގެ މައްޗަށް އަލިއަޅުވާލަފައިވާނެ ކަމަށް ޒަކާތު ހައުސްއިން ބުންޏެވެ.
މީގެ އިތުރުން ޒަކާތް ނެރެންޖެހޭ މުދަލާއި، ޒަކާތަށް ނެރޭނެ މިންވަރު ހިސާބު ކުރާނެ ގޮތްތަކުގެ އިތުރުން، ދިވެހިރާއްޖޭގެ ޒަކާތުގެ ނިޒާމު ބައްޓަންވެފައިވާ ގޮތާއި ޒަކާތު ފަންޑުން ފޯރުކޮށްދޭ އެހީތަކާ ގުޅޭ ތަފުސީލީ މައުލޫމާތުތައް ބައިވެރިންނާ ހިއްސާކޮށްފައިވާކަމަށް ވެސް ޒަކާތު ހައުސްއިން މައުލޫމާތު ދީފައިވެއެވެ.
ޒަކާތު ހައުސްއިން އިތުރަށް ބުނީ، އިއްޔެގެ މެންދުރުފަހުގެ ވަގުތެއްގައި ހުރާ ސްކޫލުގެ ދަރިވަރުންނަށް ހާއްސަކޮށްގެން ވެސް މައުލޫމާތު ސެޝަނެއް ކުރިއަށް ގެންގޮސްފައިވާކަމަށެވެ. އަދި ހަވީރުގެ ވަގުތުގައި ޒަކާތު ހައުސްގެ ޓީމުން އެ ރަށުގެ ބައެއް ވިޔަފާރި މަރުކަޒުތަކަށް ޒިޔާރަތްކޮށް، ވިޔަފާރިވެރިންނަށް މުދަލު ޒަކާތާ ގުޅޭ މުހިންމު މައުލޫމާތުތައް ސާފުކޮށްދީފައިވާކަމަށްވެސް ބުންޏެވެ.
މީގެއިތުރުން، އިއްޔެގެ މަޣްރިބް ނަމާދަށްފަހު ހުރާގެ ޒިންނޫރައިން މިސްކިތުގައި ޒަކާތުގެ ޝަރުޢީ ޙުކުމްތަކާ ގުޅޭގޮތުން ހާއްސަ ދީނީ ދަރުސެއް ވެސް ދީފައިވެއެވެ. މި ދަރުސް ދެއްވީ ޒަކާތު ހައުސްގެ ވާޢިޡު މުޝްރިފް، އައްޝައިޚް ޢިއްޒައްދީން އަދުނާނެވެ.
ހުރާ ކައުންސިލާއި ހުރާ ސްކޫލް މެނޭޖްމަންޓުގެ ބޮޑު އެހީތެރިކަމަކާއެކު ކުރިއަށް ގެންދިޔަ މި ހަރަކާތްތަކަށް އެ ދެ އިދާރާގެ އިތުރުން ހުރާގެ ލޮބުވެތި ރައްޔިތުންގެ ފަރާތުން ލިބުނު ފުރިހަމަ އެއްބާރުލުމާއި ތަރުހީބު ފާހަގަކޮށް، ޒަކާތު ހައުސްގެ މެނޭޖްމަންޓާއި މުވައްޒަފުންގެ ނަމުގައި އެ ފަރާތްތަކަށް ވަނީ އިޚްލާޞްތެރިކަމާއެކު ޝުކުރު އަދާކޮށްފައެވެ.
ކިޔުންތެރިންގެ ހިޔާލު