މި އޮގަސްޓް މަހުގެ 16 އިން 22 އާ ދެމެދު ހުށަހެޅުނު 39 މައްސަލައެއްގައި ޖުމްލަ 457,776.96 ރުފިޔާ އޮޅުވައިލައިގެން ފޭރިގެންފައިވާ ކަމަށް ތަފާސްހިސާބުތަކުން ދައްކައިފިއެވެ.
އެ މުއްދަތުގައި ގެއްލުނު ފައިސާގެ ތެރެއިން ކަމާ ގުޅޭ މުއައްސަސާތަކާއި ބޭންކުތައް ގުޅިގެން ކުރި މަސައްކަތުން 222,755.20 ރުފިޔާ އަނބުރާ ހޯދިފައިވެއެވެ. ރިޕޯޓުކުރެވުނު މައްސަލަތަކުގެ ތެރެއިން އެންމެ ގިނައީ އީ-ކޮމާސް ނުވަތަ އޮންލައިން ވިޔަފާރީގެ މައްސަލަތައް ކަމަށް ވާއިރު އެ ބާވަތުގެ 13 މައްސަލައެއް ހިމެނެއެވެ. ދެވަނައަށް އެންމެ ގިނައީ ބޭރު ފައިސާ މާރުކުރުމުގެ 10 މައްސަލައެވެ.
މީގެ އިތުރުން އެހެން މީހެއް ކަމަށް ހެދިގެން ފައިސާ ހޯދުމުގެ ފަސް މައްސަލައާއި ބުކިން ކެންސަލް ކުރުމާއި ރިފަންޑާ ގުޅޭ ހަތަރު މައްސަލައާއި އިންވެސްޓްމަންޓް ސްކޭމްތަކުގެ ދެ މައްސަލައެއް ހިމެނެއެވެ. އެ ނޫން ބާވަތްތަކުގެ ފަސް މައްސަލައެއް ވެސް ހުށަހެޅިފައިވެއެވެ.
މި ބާވަތުގެ ޖަރީމާތަކުން ރައްކާތެރިވުމަށް ނުދަންނަ ފަރާތްތަކަށް ކުރިއާލައި ފައިސާ ނުފޮނުވުމާއި ފައިސާ މާރުކުރާ ނަމަ ލައިސަންސް އޮތް ތަންތަން ބޭނުންކުރުމާއި ފައިސާ ޓްރާންސްފާ ކުރުމުގެ ކުރިން ސީދާ އެ ފަރާތަކަށް ގުޅައިގެން ޔަގީންކުރުމަށް އިލްތިމާސްކޮށްފައިވެއެވެ. ހަމައެހެންމެ ކުރު މުއްދަތެއްގައި ބޮޑު ފައިދާ ލިބޭނެ ކަމަށް ބުނާ އިންވެސްޓްމަންޓް ފުރުސަތުތައް ރަނގަޅަށް ދިރާސާކުރުމާއި ރިފަންޑެއް ފޮނުވުމުގެ ކުރިން އެ ފައިސާ އެކައުންޓަށް ވަދެފައިވާ ކަން ޔަގީންކުރުމަށް ވެސް އެދިފައިވެއެވެ.
ފައިސާގެ ކޮންމެ މުއާމަލާތެއް ކުރުމުގެ ކުރިން ވެސް އެ ކަމެއްގެ ސައްހަކަން ކަށަވަރުކުރުމަކީ މުހިންމު ކަމެކެވެ.
ކިޔުންތެރިންގެ ހިޔާލު