ކުރިން ރައީސްކަން ކުރެއްވި ބައެއް ބޭފުޅުން ބޭނުންކުރެއްވި މޭޒެއް ނީލަމުގައި ވިއްކާލާފައިވާކަމަށް ބުނެ ދެކެވެމުންދާ ވާހަކަތައް ރައީސުލްޖުމްހޫރިއްޔާގެ އޮފީހުން ދޮގުކޮށްފިއެވެ.
ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް ނެރުއްވި ބަޔާނެއްްގައި ވިދާޅުވީ ރައީސް އޮފީހުން ނީލަމުގައި ވިއްކާލާފައިވާކަމަށް ބުނެ މީޑިއާގައި ފޮޓޯ ދައުރުވަމުންދާ މޭޒަކީ ރާއްޖޭގެ އެއްވެސް ރައީސަކު އެއްވެސް ދުވަސްވަރަކު ބޭނުންކުރައްވާފައިވާ މޭޒެއް ނޫންކަމަށެވެ. އެ މޭޒަކީ ކަތުރުފަނި އެޅުމުގެ ސަބަބުން ބޭނުން ނުކުރެވޭ ވަރަށް ހަލާކުވެ، ބަލަހައްޓަން ދަތިވެފައިވާ މޭޒެއްކަމަށާއި، އެ މޭޒު ނީލަމަށްލީ ދައުލަތުގެ އެފަދަ މުދާ ނީލަމަށް ލާން އޮންނަ އުޞޫލުތަކާއި އިޖުރާޢަތުތަކާ އެއްގޮތަށްކަމަށް ތަރުޖަމާނު ވިދާޅުވިއެވެ.
ނީލަމަށްލާ ފަރުނީޗަރުތަކުގައި ދައުލަތުގެ ނިޝާން ހިމެނޭނަމަ ނީލަމަށްލުމުގެ ކުރިން އެ ނިޝާން އެ ފަރުނީޗަރުން އުނިކުރާނެކަމަށާއި، ނަމަވެސް އެ މޭޒުގެ ފޮޓޯއާއި ޚަބަރުތައް ފަތުރަމުންދަނީ، ފޮޓޯގެ އަސްލަށް ބަދަލުގެނެސްގެންކަމަށް ތަރުޖަމާނު ވިދާޅުވިއެވެ. އަދި އެ އުނި އިތުރު ގެނެސްފައިވަނީ ކުރީގެ ރައީސުން ބޭނުންކުރި ރަސްމީ މޭޒެއްގެ ގޮތުގައި ދެއްކުމަށްކަމަށްވެސް ތަރުމާނުވަނީ ވިދާޅުވެފައެވެ.
އެހެންކަމުން އެފަދަ ޚަބަރުތައް ޝާޢިއުކުރާއިރު ސީދާ ކަމާބެހޭ ރަސްމީ އިދާރާތަކުން ސައްޙަ މަޢުލޫމާތު ހޯދުމަށާއި، މަޢުލޫމާތުގެ ސައްޙަކަން ކަށަވަރުކުރުމަށް ތަރުޖަމާނު އިލްތިމާސްކުރެއްވިއެވެ. އަދި ރައްޔިތުންނަށް އޮޅޭ ގޮތަށް މަޢުލޫމާތު ނުފެތުރުމަށްވެސް ތަރުޖަމާނު ވަނީ އެދިވަޑައިގެންފައެވެ.
ކިޔުންތެރިންގެ ހިޔާލު