ޕޯސްޓް މެދުވެރިކޮށް ރާއްޖެ އެތެރެކުރި ތިން ކިލޯއަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް ސަރވިސްއިން އަތުލައިގަނެފިއެވެ.
ކަސްޓަމްސްއިން ބުނީ މި ތަކެތި އަތުލައިގަތީ ޕޯސްޓުން ގެނެސްފައިވާ ޕެކޭޖެއް މިދިޔަ ހޮނިހިރު ދުވަހު ބަލައިފާސް ކުރުމުގެ ތެރޭގައެވެ. އެ ޕެކޭޖުގެ ތެރޭގައި މަސްތުވާތަކެތި ހުރި ކަމަށް ޝައްކު ކުރެވިގެން އިތުރަށް ބެލިބެލުމުން، ތިން ހާސް ދުއިސައްތަ ފަންސާސް ދެ ގްރާމްގެ ކެނަބިސް ފެނިފައިވާ ކަމަށް އެ މުއައްސަސާއިން މައުލޫމާތު ދެއެވެ.
މި މައްސަލައާ ގުޅިގެން މީހަކު ހައްޔަރުކޮށްފައިވާ ކަމެއް މިހާތަނަށް ފުލުހުންގެ ފަރާތުން ކަށަވަރުކޮށްދީފައެއް ނުވެއެވެ.
ޕޯސްޓް މެދުވެރިކޮށް ގިނަ އަދަދެއްގެ މަސްތުވާތަކެތި އެތެރެކުރުމުގެ މައްސަލަތަކެއް މީގެ ކުރިންވެސް ވަނީ ފެންމަތިވެފައެވެ. އެފަދަ މައްސަލަތަކުގައި ޕެކޭޖާ ހަވާލުވާން ދާ މީހުން ހައްޔަރުކޮށް، މީގެ ކުރިން ޖަލު ހުކުމްވެސް ކޮށްފައިވެއެވެ.
ކަސްޓަމްސްއިން މީގެ ކުރިން ހާމަކޮށްފައިވާ ގޮތުގައި، ޕޯސްޓް މެދުވެރިކޮށް ރާއްޖެ ގެންނަ ޕެކޭޖުތައް އަބަދުވެސް ސްކޭން ކުރެއެވެ. އަދި ޝައްކު ކުރެވޭ ޕެކޭޖުތައް ވަކިން ބަހައްޓައިގެން އިތުރަށް ބަލައިފާސްކުރުމުގެ މަސައްކަތް އެ މުއައްސަސާއިން ކުރިއަށްގެންދެއެވެ.
ކިޔުންތެރިންގެ ހިޔާލު