މާލޭ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އިން ކުންފުނީގެ ހިންގުން ހަރުދަނާކޮށް ލީޑަރޝިޕް ރޫޙު އާލާކުރުމުގެ ގޮތުން އެމްއެންޑީއެފާ ގުޅިގެން ކ. ގިރިފުށީގައި ދެ ދުވަހާއި ބައިގެ މުއްދަތަށް ކުރިއަށްގެންދިޔަ ޚާއްޞަ ލީޑަރޝިޕް ވޯކްޝޮޕް ކާމިޔާބުކަމާއެކު ނިންމާލައިފިއެވެ.
މި ތަމްރީނު ޕްރޮގްރާމަކީ ކުންފުނީގެ އެކި ޑިވިޜަންތަކާއި ޑިޕާޓްމަންޓްތަކުގެ އިސްވެރިން ހިމެނޭހެން 39އަށްވުރެ ގިނަ މުވައްޒަފުން ބައިވެރިކޮށްގެން، މަސައްކަތުގެ މާޙައުލުގައި ދިމާވާ ގޮންޖެހުންތަކުން އަރައިގަނެވޭނެ އެކުވެރި ލީޑަރޝިޕް ކަލްޗަރއެއް ބިނާކުރުމަށް އިންތިޒާމުކުރި ހަރަކާތެކެވެ.
ވޯކްޝޮޕްގެ ތެރޭގައި ނިންމުންތައް ނިންމުމުގެ ހުނަރާއި ކުއްލި ޙާލަތްތައް މެނޭޖްކުރުމަށް ބޭނުންވާ ޢަމަލީ ތަމްރީނުތަކާއި، ސްޓްރެޓީޖިކް ވިސްނުން ހަރުދަނާކުރުމުގެ ފުރުޞަތުތައް ބައިވެރިންނަށް ވަނީ ފަހިކޮށްދީފައެވެ. މީގެ އިތުރުން މަސައްކަތުގެ މާޙައުލުގެ ރައްކާތެރިކަމަށް އިސްކަންދީގެން ފަސްޓް އެއިޑާއި އަލިފާން ނިއްވުމުގެ ތަމްރީނުތަކުގެ އިތުރުން އެމްއެންޑީއެފްގެ އޮބްސްޓެކަލް ކޯސްތަކާއި ކަނޑުމަތީގެ ކުއްލި ޙާލަތްތަކުން ސަލާމަތްވުމުގެ ޑްރިލްތައްވެސް ކުރިއަށްގެންދިޔައެވެ.
މި ހަރަކާތާ ގުޅޭގޮތުން އެމްޑަބްލިޔުއެސްސީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ މިއީ ގުޅިގެން މަސައްކަތްކުރުމުގެ ރޫޙާއި، އަޚުލާޤާއި، ސްޓްރެޓީޖިކް ވިސްނުމުގެ އިތުރުން ސާބިތުކަން އިތުރުކުރުމަށް އެޅުނު ވަރަށް މުހިންމު ފިޔަވަޅެއް ކަމަށެވެ. އަދި މި ޕްރޮގްރާމުން ޙާސިލުކުރެވުނު ޢިލްމާއި ތަޖުރިބާގެ އަލީގައި ކުންފުނީގެ ނިންމުންތައް އިތުރަށް ހަރުދަނާވެ، މަސައްކަތުގެ މާޙައުލުގައި ޓީމުތަކުގެ ޤާބިލުކަން އިތުރުވެގެންދާނެ ކަމަށްވެސް އޭނާ ވިދާޅުވިއެވެ.
ޤާބިލު ލީޑަރުން ބިނާކުރުމުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ދެއްވާ ޚާއްޞަ އިސްކަމަށް ޝުކުރު އަދާކުރައްވަމުން، މިނިސްޓަރ އޮފް ޑިފެންސާއި ޗީފް އޮފް ޑިފެންސް ފޯސްގެ އިތުރުން އެމްއެންޑީއެފްގެ ލީޑަރޝިޕުން ދެއްވި އެއްބާރުލެއްވުމަށް މެނޭޖިން ޑިރެކްޓަރު ވަނީ ފަށްފަށުން ޝުކުރު އަދާކުރައްވާފައެވެ.
ކިޔުންތެރިންގެ ހިޔާލު