ސްޕެނިޝް ލަލީގާގެ އައު ސީޒަން މާދަމާ ރޭ ފެށުމަށް ތައްޔާރުވެއްޖެއެވެ.
އައު ސީޒަން ފެށިނަމަވެސް ފުރަތަމަ ހަފްތާގައި ޗެމްޕިއަން އެފްސީ ބާސެލޯނާ އާއި ރެއާލް މެޑްރިޑް ފެނިގެނެއް ނުދާނެއެވެ.
ލަލީގާގެ އައު ސީޒަނާއި ކުރިމަތިލާއިރު މިފަހަރުވެސް އެންމެ ބޮޑު ވާދަވެރިކަމެއް ފެނިގެންދާނީ ބާސާ އާއި ރެއާލްގެ މެދުގައިކަން ގިނަ ބަޔަކު އަންނަނީ ފާހަގަ ކުރަމުންނެވެ. މިފަހަރުގެ މުބާރާތާއި ޗެމްޕިއަން ބާސާއިން ކުރިމަތިލަނީ ޖެހިޖެހިގެން ތިންވަނަ ފަހަރަށް ލަލީގާގެ ތަށި އުފުލާލުމުގެ އުންމީދާއެކުއެވެ. ބާސާއިންވަނީ ވޭތިވެދިޔަ ދެސީޒަންގައިވެސް ލަލީގާ ކާމިޔާބު ކޮށްފައެވެ. ބާސާގެ މިމަސައްކަތަށް ހުރަސް އެޅުވުމުގެ ބޭނުމުގައި ރެއާލް އިންވަނީ އެޓީމުގެ ކޯޗަކަށް މިސީޒަންގައި ތަޖްރިބާކު ހޯސޭ މޮރީނިއޯ ގެންގޮސްފައެވެ. އަދި ޓީމު ވަރުގަދަ ކުރުމުގެ ގޮތުން ފާހަގަ ކޮށްލެވޭ ގިނަ ކުޅުންތެރިންތަކެއްވެސް އެޓީމަށް ގެންގޮސްފައިވެއެވެ. ރެއާލްއިން ވަނީ ލީގު ތަށި ކާމިޔާބު ނުކުރެވި ދެ ސީޒަން ގޮސްފައިވުމުގެ ސަބަބުން މިކަން ބަދަލު ކުރުމަށް މިފަހަރު އަޒުމް ކަނޑައަޅައިފައެވެ.
އައު ސީޒަނަށް ވަރަށް ފޯރިއާއެކު މިހާރު ތައްޔާރުވަމުންދިޔަ ނަމަވެސް ލަލީގާގެ ފުރަތަމަ ހަފްތާގައި މިދެޓީމު ވާދަނުކުރާ ގޮތަށް ލީގުން ވަނީ ހަދައިދީފައެވެ.
މީގެ އެންމެ ބޮޑު އެއް ސަބަބަކަށް ވެފައިވީ މިދެޓީމަށް ނިސްބަތްވާ ގިނަަ ކުޅުންތެރިންތަކެއް ވޯލްޑް ކަޕްގެ ފަހުގެ މަރުހަލާތަކުގައި ވާދަކޮށްފައިވުމެވެ. ނިމިގެންދިޔަ ވޯލްޑް ކަޕްގެ ތަށި އުފުލާލި ސްޕެއިން ޓީމުގެ 8 ކުޅުންތެރިން ބާސާ ޓީމަށް ނިސްބަތްވެއެވެ. އަދި ރެއާލް އަށް ބަލާލާއިރު އެޓީމުގައިވެސް ސެމީ ފައިނަލަށް ދަތުރުކުރި ފަރަންސޭސި ޓީމަށް ނިސްބަތްވާ ކުޅުންތެރިންގެ އިތުރުން އިންގްލަންޑާއި ސްޕެއިން ޓީމުން ފެނިގެންދިޔަ ކުޅުންތެރިން ހިމެނެއެވެ.
މިއާއެކު ބާސާއިން ލަލީގާގައި ކުޅޭ ފުރަތަމަ މެޗު ކުޅުމަށް ހަމަޖެހިފައިވަނީ އޮގަސްޓް މަހުގެ 23 ވަނަ ދުވަހު އެލްޗޭ އާއި ދެކޮޅަށެވެ. އަދި ރެއާލް ނިކުންނާނީ އޮގަސްޓް މަހުގެ 22 ވަނަ ދުވަހު އެންޕަންޔޯލް އާއި ދެކޮޅަށެވެ.
އައު ސީޒަންގެ ފުރަތަމަ މެޗުގައި ބައްދަލުކުރުމަށް ހަމަޖެހިފައިވަނީ މާދަމާ ރޭ އަލަވޭޒް އާއި ގެޓާފޭއެވެ. މީގެއިތުރުން އާދިއްތަ، ހޯމަ އަދި ބުދަދުވަހާއެކު ފުރަތަމަ ހަފްތާގެ އިތުރު 6 މެޗު ކުޅުމަށް ހަމަޖެހިފައިވެެެއެވެ.
ކިޔުންތެރިންގެ ހިޔާލު