ޖުޑިޝަލް ސާވިސް ކޮމިޝަނުން ކްރިމިނަލް ކޯޓަށް ތިން ގާޒީން އަދި ސިވިލް ކޯޓަށް ދެ ގާޒީން އައްޔަނުކޮށް، އެ ބޭފުޅުން މަގާމުގެ ހުވާ މިއަދު ކުރައްވައިފިއެވެ.
ކްރިމިނަލް ކޯޓަށް ގާޒީން ހޯދުމަށް ޖުޑިޝަލް ސާވިސް ކޮމިޝަނުން ކުރި އިއުލާނާ ގުޅިގެން ކުރިމަތިލެއްވި ފަރާތްތަކާ އިންޓަވިއު ކުރުމަށްފަހު، އެ ކޯޓުގެ ގާޒީ ކަމަށް ތިން ބޭފުޅަކު އައްޔަނުކުރުމަށް ވަނީ ނިންމާފައެވެ.
ކްރިމިނަލް ކޯޓުގެ ގާޒީ ކަމަށް އައްޔަނުކުރެއްވީ ޅ. ކުރެންދޫ ނޫރާނީމާގެ ސުލައިމާން މުޙައްމަދާއި، ހއ. ދިއްދޫ ޑޭޒީމާގެ އަޙްމަދު ތައުފީގުގެ އިތުރުން ތ. ވޭމަންޑޫ ޑްރީމް މުޙައްމަދު ޢަބްދުﷲއެވެ.
އޭގެ ތެރެއިން ސުލައިމާން މުޙައްމަދަކީ ކޮލެޖް އޮފް އިސްލާމިކް ސްޓަޑީސްއިން ބެޗްލާ އޮފް ޝަރީޢާ އެންޑް ލޯ ހާސިލްކުރައްވާފައިވާ ބޭފުޅެކެވެ. އޭނާ ވަނީ 2022 ވަނަ އަހަރުގެ ސެޕްޓެމްބަރު މަހުން ފެށިގެން ކުރެންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓްކަން ކުރައްވާފައެވެ. ސުލައިމާން ވަނީ ޝަރުއީ ދާއިރާގައި 12 އަހަރަށްވުރެ ދިގު މުއްދަތެއްގައި ޚިދުމަތް ކުރައްވާފައެވެ.
ކްރިމިނަލް ކޯޓަށް އައްޔަނުކުރެއްވި އަޙްމަދު ތައުފީގަކީ ޝަރުއީ ދާއިރާގައި 18 އަހަރުގެ ތަޖުރިބާ ހުރި ބޭފުޅެކެވެ. އޭނާ ވަނީ އެޓާނީ ޖެނެރަލްގެ އޮފީހާއި ޕްރޮސެކިއުޓާ ޖެނެރަލްގެ އޮފީހުގެ އެކި މަގާމުތައް ފުރުއްވާފައެވެ.
ކްރިމިނަލް ކޯޓަށް އައްޔަނުކުރެވުނު މުޙައްމަދު ޢަބްދުﷲއަކީ 2017 ވަނަ އަހަރުގެ ސެޕްޓެމްބަރު މަހުން ފެށިގެން ޕްރޮސެކިއުޓާ ޖެނެރަލްގެ އޮފީހުގެ ސީނިއާ ޕަބްލިކް ޕްރޮސެކިއުޓަރުގެ މަގާމު ފުރުއްވަމުން އަންނަ ބޭފުޅެކެވެ.
ސިވިލް ކޯޓުގެ ގާޒީ ކަމަށް އައްޔަނުކުރެއްވީ ގއ. ކަނޑުހުޅުދޫ ރީލްމަންޒިލް އަލްއުސްތާޛު މުޙައްމަދު ނިޝާޠާއި، ރ. ހުޅުދުއްފާރު ރޯޒްވިލާ އަލްއުސްތާޛާ އާސިޔާ އަޒީމާއެވެ.
މުޙައްމަދު ނިޝާޠަކީ ޝަރުއީ ދާއިރާއާ ގުޅުންހުރި މަގާމުތަކުގައި 15 އަހަރަށްވުރެ ދިގު މުއްދަތެއްގައި މަސައްކަތް ކުރައްވާފައިވާ ބޭފުޅެކެވެ. އަދި އާސިޔާ އަޒީމާއަކީ ރައްޔިތުންގެ މަޖިލީހުގެ ލީގަލް އޮފިސަރުގެ މަގާމާއި ލީގަލް އެފެއާޒްގެ ޑެޕިއުޓީ ޑިރެކްޓަރުގެ މަގާމު ފުރުއްވާފައިވާ ބޭފުޅެކެވެ.
ކިޔުންތެރިންގެ ހިޔާލު