އިދިކޮޅު ފަރާތްތަކުން ޑޮލަރުގެ ތާށިކަން އޮތް ކަމަށް ބުނެ ވާހަކަދައްކަނީ ސިޔާސީ ބޭނުމުގައި މުޒާހަރާއަށް މީހުން ޖަމާކުރުމަށް ކަމަށް އިކޮނޮމިކް މިނިސްޓަރު މުޙައްމަދު ސައީދު މީސްމީޑިއާގައި އާންމުކުރެއްވި ވީޑިއޯ މެސެޖެއްގައި ވިދާޅުވެއްޖެއެވެ.
މިނިސްޓަރު ސައީދު ވިދާޅުވީ ޑޮލަރު ތާށިކަމަށް ބުނެ އިދިކޮޅު ފަރާތްތަކުން ފަތުރަމުންދާ ވާހަކަތަކުގެ ސަބަބުން ޑޮލަރުގެ ކަޅު ބާޒާރަށް އިތުރު ހިތްވަރެއް ލިބި، ގައުމީ އިގުތިޞާދަށް ނުރައްކާތަކާ ކުރިމަތިވަމުންދާ ކަމަށެވެ. އެ މޭރުމުން ވާހަކަދެއްކުމުގެ އަސާސީ މަގުސަދަކީ ސަރުކާރާ ދެކޮޅަށް ރައްޔިތުން މަގުމައްޗަށް ނެރުން ކަމަށްވެސް އޭނާ ފާހަގަކުރެއްވިއެވެ.
މި ވާހަކަތައް މިނިސްޓަރު ދެއްކެވީ އިދިކޮޅު އެމްޑީޕީން ‘ދަތިވެއްޖެ’ ނަމުގައި މަގުމަތީ މުޒާހަރާއެއް ބޭއްވުމަށް ތައްޔާރުވަމުންދާ ދަނޑިވަޅެއްގައެވެ.
ގާތްގަނޑަކަށް ދިހަ މިނެޓުގެ އެ ވީޑިއޯ މެސެޖުގައި މިނިސްޓަރު ވަނީ ނިމިދިޔަ އެމްޑީޕީ ސަރުކާރުގެ ދުވަސްވަރު އިގުތިޞާދީ އަދި ޑޮލަރުގެ ހާލަތު އޮތް ގޮތުގެ މައްޗަށް އަލިއަޅުވާލައްވާފައެވެ. އެމްއެމްއޭއާއި ބޭންކް އޮފް މޯލްޑިވްސް މެދުވެރިކޮށް ވިޔަފާރިތަކަށާއި ބޭރުގައި ކިޔަވާ ދަރިވަރުންނަށް އަދި ބޭސްފަރުވާއަށް ފުރާ މީހުންނަށް ކުރިން ދޫނުކުރާ މިންވަރަށް މިހާރު ޑޮލަރު ދޫކުރަމުންދާ ކަމަށް އޭނާ ވިދާޅުވިއެވެ.
ކަޅު ބާޒާރުގައި ޑޮލަރުގެ އަގު އުފުލެނީ ބޭންކިން ނިޒާމުގެ ތެރެއަށް ޑޮލަރު ނުވައްދައި ބޭރުގައި ވިއްކާތީ ކަމަށާއި، އެ ކަމަށް ހިތްވަރު ލިބެނީ ސިޔާސީ އިސް ބޭފުޅުން ދައްކަވާ ވާހަކަތަކުގެ ސަބަބުން ކަމަށް ސައީދު ތުހުމަތުކުރެއްވިއެވެ.
ކުރިއަށް އޮތް ދިހަ ދުވަސް ތެރޭގައި ޑޮލަރުގެ އަގު ނަވާރަ ރުފިޔާއަށް ކުޑަކުރުމަށް ކުރީގެ ރައީސް މުޙައްމަދު ނަޝީދު ގޮވާލެއްވި ގޮވާލެއްވުމަށްވެސް މިނިސްޓަރު ރައްދުދެއްވިއެވެ. ނަޝީދުގެ ވެރިކަމުގައި ޑޮލަރު ނުލިބިގެން ކިޔޫ ދަމާލަންޖެހުނު ހާލަތާއި، އެ ވެރިކަން ނިމުނުއިރު ޑޮލަރުގެ އަގު ސަތާރަ ރުފިޔާއަށް އުފުލިގެންދިޔަ ކަން އޭނާ ހަނދާންކޮށްދެއްވިއެވެ.
ތަކެތީގެ އަގު އުފުލޭ ކަމަށް ބުނެ ދައްކާ ވާހަކަތަކަށް އިޝާރާތް ކުރައްވަމުން، ވެލާނާ އިންޓަނޭޝަނަލް އެއާޕޯޓު ޖީއެމްއާރަށް ދޫކޮށްލި ހާދިސާއަށްވެސް މިނިސްޓަރު އަލިއަޅުވާލެއްވިއެވެ. ގައުމުގެ އިގުތިޞާދަށް ގެއްލުންވާ ފަދަ ސިޔާސީ ވާހަކަތައް ނުދެއްކެވުމަށް މިނިސްޓަރު ސައީދު ވަނީ އިދިކޮޅު ފަރާތްތަކަށް އިލްތިމާސްކުރައްވާފައެވެ.
ކިޔުންތެރިންގެ ހިޔާލު