އެންމެ ފަހުގެ ޖެނެރޭޝަންގެ ޓްވިން އޮޓަރ ކްލެސިކް 300 ޖީގެ ދެ މަތިންދާބޯޓު ގެނައުމަށް އޯޑަރުކުރި ފުރަތަމަ ދިވެހި އެއަރލައިނަކީ މޯލްޑިވިއަން ކަމަށް އެ ކުންފުނީގެ މެނޭޖިންގ ޑިރެކްޓަރ އިބްރާހިމް އިޔާސް ވިދާޅުވެއްޖެއެވެ.
އޭނާ މިހެން ވިދާޅުވީ ކެނެޑާގެ ޑީ ހެވިލިއަން ކުންފުންޏާއެކު ދެ މަތިންދާބޯޓު ގަތުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިއީ 2018 ވަނަ އަހަރުގެ ފަހުން މޯލްޑިވިއަންގެ ޓްވިން އޮޓަރ ފްލީޓަށް އިތުރު މަތިންދާބޯޓު އިތުރުކުރެވޭ ފުރަތަމަ ފަހަރެވެ.
އިބްރާހިމް އިޔާސް ފާހަގަކުރެއްވި ގޮތުގައި 2014 ވަނަ އަހަރު އެންމެ ދެ ބޯޓުން ފެށި މޯލްޑިވިއަންގެ ސީޕްލޭން ޚިދުމަތް ވަނީ މިއަދު ފަތުރުވެރިކަމުގެ ދާއިރާގެ ވަރުގަދަ ބައިވެރިއަކަށް ބަދަލުވެފައެވެ. އެ ކުންފުނީގެ ސީޕްލޭން ފްލީޓުގައި މިހާރު 11 ޓްވިން އޮޓަރ މަތިންދާބޯޓު އޮތްއިރު، ރިސޯޓުތަކަށާއި މީހުން ދިރިއުޅޭ ރަށްރަށަށް އިތުބާރުހުރި ޚިދުމަތެއް ކެނޑިނޭޅި ފޯރުކޮށްދެމުންދެއެވެ.
އަދި މިއަހަރުގެ ފެބްރުއަރީ 1 ވަނަ ދުވަހުން ފެށިގެން ފުރޮޅުލީ ޓްވިން އޮޓަރ މަތިންދާބޯޓުގައި ޝެޑިއުލް ކޮމާޝަލް ދަތުރުތައް ރާއްޖޭގައި ފެށި ފުރަތަމަ އެއަރލައިނަކީވެސް މޯލްޑިވިއަންކަން މެނޭޖިންގ ޑިރެކްޓަރ ފާހަގަކުރެއްވިއެވެ. މި އާ މަތިންދާބޯޓުތައް ފްލީޓަށް އިތުރުކުރުމުގެ އެއްބަސްވުމަކީ ޤައުމީ އެއަރލައިންގެ ޚިދުމަތް އިތުރަށް ފުޅާކޮށް ވަރުގަދަކުރުމަށް ކުރެވޭ ތާރީޚީ މަސައްކަތެއްގެ ގޮތުގައި އޭނާ ސިފަކުރެއްވިއެވެ.
އިބްރާހިމް އިޔާސް އިތުރަށް ވިދާޅުވީ، ޓްވިން އޮޓަރ ކްލެސިކް 300 ޖީ މަތިންދާބޯޓަކީ ރާއްޖޭގެ ތިމާވެއްޓާއި މާހައުލާ ގުޅޭގޮތަށް އުފައްދާފައިވާ ބޯޓެއްކަމުން ކުރިން ގެނެވުނު މިފަދަ ބޯޓުތަކަށް ގެންނަންޖެހޭ ބަދަލުތައް މި ބޯޓަށް ގެންނަން ނުޖެހޭނެ ކަމަށެވެ. މީގެއިތުރުން، މި އެއްބަސްވުމަކީ އައިލެންޑް އޭވިއޭޝަނާއި ކެނެޑާގެ ޑީ ހެވިލިއަން ކުންފުންޏާ ދެމެދު އޮތް ދިގުދެމިގެންވާ ބަދަހި ގުޅުން ރަމްޒުކޮށްދޭ މުހިންމު ފިޔަވަޅެއްކަމަށްވެސް އޭނާ ވިދާޅުވިއެވެ.
ކިޔުންތެރިންގެ ހިޔާލު