ހުޅުމާލެ ފުރަތަމަ ފިޔަވަހީގައި ހުންނަ އެޕޯލޯ ޓަވަރުގެ ހަވަނަ ފަންގިފިލާގެ ބެލްކަނީން ވެއްޓުނު އުމުރުން ހަތަރު އަހަރުގެ ކުޑަ އަންހެން ކުއްޖަކަށް ސީރިއަސް އަނިޔާތަކެއް ވެގެން ހުޅުމާލެ ހޮސްޕިޓަލުގައި ފަރުވާދީފިއެވެ.
މި ހާދިސާ ހިނގާފައިވަނީ އާދިއްތަ ދުވަހުގެ ހަވީރު ހަތަރެއް ސާޅީސް ފަސް ހާއިރު، އެ އިމާރާތުގެ ހަވަނަ ފަންގިފިލާގެ ބެލްކަނީން އެ ކުއްޖާ ދެވަނަ ފަންގިފިލާގެ ބެލްކަނީގެ ފުރާޅުމައްޗަށް ވެއްޓިގެންނެވެ.
މި ހާދިސާގެ ރިޕޯޓު ލިބުމާއެކު ފުލުހުން ވަނީ އެ ކުއްޖާ ހުޅުމާލެ ހޮސްޕިޓަލަށް ގެންގޮސް ފަރުވާ ދިނުމަށްފަހު މިހާރު ދޫކޮށްލާފައެވެ. އެނގިފައިވާ ގޮތުގައި މި ހާދިސާގައި އެ ކުއްޖާގެ އެއް އަތާއި ފައި ވަނީ ބިންދައިގެން ގޮސްފައެވެ.
މި ހާދިސާ ހިނގި ވަގުތު އެ މަންޒަރު ފެނުނު މީހަކު ސޯޝަލް މީޑިއާގައި ބުނެފައިވަނީ، ދެވަނަ ފަންގިފިލާގެ ފުރާޅު އެތަނުގައި ނެތްނަމަ ކުއްޖާއަށް ލިބޭނެ އަނިޔާ މާ ބޮޑުވާނެ ކަމަށެވެ. އަދި މިއީ އޭނާގެ ހަޔާތުގައި ތަޖުރިބާކުރި އެންމެ ބިރުވެރި ވަގުތުކޮޅު ކަމަށްވެސް އޭނާ ބުނެފައިވެއެވެ.
މި ހާދިސާއާ ގުޅިގެން، މަންޒަރު ދުށް ފަރާތުން ވަނީ ކުޑަކުދިންގެ މިފަދަ ކަންކަމުގައި ބެލެނިވެރިން އިތުރަށް ސަމާލުވެ ރައްކާތެރިވުމަށް ނަސޭހަތްތެރިވެފައެވެ. މާލެއާއި ހުޅުމާލޭގެ އުސް އިމާރާތްތަކުން ކުޑަކުދިން ވެއްޓޭ ހާދިސާތައް މީގެ ކުރިންވެސް ހިނގާފައިވާއިރު، ބައެއް ހާދިސާތަކުގައި ކުދިންގެ ފުރާނަވެސް ގޮސްފައިވެއެވެ.
ކިޔުންތެރިންގެ ހިޔާލު