އަހަރުގެ މިހާތަނަށް މަކަރާއި ހީލަތުން 11.5 މިލިއަނަށް ވުރެ ގިނަ ރުފިޔާ ފޭރިގެންފައިވާކަމަށް ދިވެހި ފުލުހުންގެ ހިދުމަތުގެ އެންޓި- ސްކޭމް ސެންޓަރުން ހިއްސާކޮށްފައިވާ ތަފާސްހިސާބުތަކުން ދައްކައިފިއެވެ.
އެ ސެންޓަރުން ހިއްސާކުރި ތަފާސްހިސާބުތަކަށް ބަލާއިރު އަހަރުގެ މިހާތަނަށް މަކާރާއި ހީލަތުގެ 1258 މައްސަލައެއް ރިޕޯޓުކޮށްފައިވެއެވެ. މީގެ ތެރެއިން 605 މައްސަލައެއްގައި ގެއްލުނު ފައިސާ އެއްކޮށް ހޯދާފައިވާއިރު 240 މައްސަލައެއްގައި ގެއްލުނު ފައިސާގެ ތެރެއިން ބައެއް ވަނީ ހޯދާފައެވެ.
މި މައްސަލަތަކުގައި 11،532،211.09 (އެގާރަ މިލިއަން ފަސް ލައްކަ ބައްތިރީސް ހާސް ދުއިސައްތަ އެގާރަ ރުފިޔާ ނުވަ ލާރި) ގެއްލުންކަމަށް ހިސާބުތަކުން ދައްކައެވެ. އޭގެތެރެއިން ހޯދިފައިވަނީ 4،487،059.11 (ހަތަރު މިލިއަން ހަތަރު ލައްކަ އައްޑިހަ ހަތް ހާސް ފަންސާސް ނުވަ ރުފިޔާ އެގާރަ ލާރި) އެވެ.
އަހަރުގެ މިހާތަނަށް ފުލުހުންނަށް އެންމެ ގިނައިން ރިޕޯޓުކޮށްފައިވަނީ އޮންލައިން ވިޔަފާރި (އީ-ކޮމާސް)ގެ މައްސަލަތަކެވެ. އެބާވަތުގެ 685 މައްސަލަ ރިޕޯޓުކޮށްފައިވެއެވެ.
ސްކޭމްގެ މައްސަލަތަކުން ރައްކާތެރިވެ ތިބުމުގެ ގޮތުން އިތުބާރުކޮށް ފައިސާ ދިނުމުގެ ކުރިން އެ ފަރާތެއްގެ ސައްހަކަން އަބަދުވެސް ކަށަވަރުކުރުމަށާއި، ޒާތީ މައުލޫމާތު އެއްވެސް ގޮތަކަށް ހިއްސާނުކުރުމަށާއި އެޕްލިކޭޝަންތަކުގެ ޓޫ ފެކްޓަރ އޮތެންޓިކޭޝަން ހެދުމަކީ މިފަދަ މައްސަލަތަކުން ރައްކާތެރިވެ ތިބުމަށް އެޅިދާނެ މުހިންމު ފިޔަވަޅެކެވެ.
އަދި ސްކޭމަރުން ކާމިޔާބުވަނީ މިފަދަ މައްސަލަތަކުގައި ހަނުހުރުމުން ކަމަށްވާއިރު، މިފަދަ މައްސަލަތައް އަވަހަށް ފުލުހުންނަށް ރިޕޯޓްކުރުމަކީ ފައިސާ އަނބުރާ ހޯދުމަށް ފަސޭހަވެގެންދާނެ ކަމެކެވެ.
މަކަރާއި ހީލަތުގެ މައްސަލަތައް ރިޕޯޓުކުރުމަށް ނޭޝަނަލް އެމަރޖެންސީ ކޯލް ސެންޓަރު 911 ނުވަތަ 125 (އެކްސްޓެންޝަން 2020) އަށް ގުޅުއްވައި، ނުވަތަ [email protected] އަށް އީމެއިލް ކުރުމުން އެހީތެރިކަން ލިބިގެންދާނެއެވެ.
ކިޔުންތެރިންގެ ހިޔާލު