ދިވެހި ފުލުހުންގެ ޚިދުމަތުން އިސްނަގައިގެން ހުޅުމާލޭގެ އާންމު ސަރަހައްދުތަކުގައި ރައްޔިތުންނާ ސީދާ ބައްދަލުކޮށް، މުޖުތަމައުގެ ސަލާމަތާއި ރައްކާތެރިކަމާ ގުޅޭގޮތުން މަޝްވަރާކޮށް އާންމުންގެ ކަންބޮޑުވުންތައް ދެނެގަތުމުގެ ހާއްސަ ސިލްސިލާ ހަރަކާތްތަކެއް ފަށައިފިއެވެ.
މި ހަރަކާތަކީ ރައްޔިތުންނާ ގާތުން މަސައްކަތްކޮށް ހުޅުމާލޭގައި އަމާން އަދި ރައްކާތެރި މާހައުލެއް ގާއިމުކުރުމަށް ފުލުހުން ފަށާފައިވާ ހާއްސަ މަސައްކަތެކެވެ. މިއީ އަވަށްޓެރި ފުލުހުންގެ ނިޒާމުގެ ތެރެއިން ކުރިއަށްގެންދާ ޕްރޮގްރާމެކެވެ.
މި ޕްރޮގްރާމުގެ ދަށުން ފުލުހުން ދަނީ ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހީގެ އެކި މަގުތަކަށާއި ޕާކުތަކުގެ އިތުރުން މީހުން ގިނައިން އެއްވެއުޅޭ އާންމު ސަރަހައްދުތަކަށް ޒިޔާރަތްކުރަމުންނެވެ. މި ބައްދަލުވުންތަކުގައި އާންމު ދިރިއުޅުމުގައި ރައްޔިތުންނަށް ދިމާވާ ދަތިތަކާއި ޝަކުވާތައް އަޑުއެހުމަށް ފުލުހުން ހާއްސަ އިސްކަމެއް ދެއެވެ.
މި ބައްދަލުވުންތަކުގައި މައިގަނޑު ގޮތެއްގައި މަޝްވަރާކުރެވެނީ ކުށްކުރުން މަދުކުރުމާއި މަގުމަތީގެ ސަލާމަތާއި ރައްކާތެރިކަން ކަށަވަރުކުރުމާ ގުޅޭގޮތުންނެވެ. މީގެ އިތުރުން މަކަރާއި ހީލަތުން ފައިސާ ހޯދާ މައްސަލަތަކުން އާންމުން ސަލާމަތްވުމަށް މައުލޫމާތުދީ، އާންމު އިޖުތިމާއީ މިންގަނޑުތަކާ ހިލާފަށް ހިނގާ ކަންކަން ހުއްޓުވުމުގައި އާންމުންގެ އެއްބާރުލުން ހޯދުމަށް ފުލުހުން ބާރުއަޅައެވެ.
މި ހަރަކާތުގެ ސަބަބުން ފުލުހުންނާއި ރައްޔިތުންނާ ދެމެދު އޮންނަ ގުޅުން އިތުރަށް ބަދަހިވެ، ރައްޔިތުންގެ ހިޔާލުތަކާއި ޝަކުވާތައް ސީދާ ފުލުހުންނަށް ހުށަހެޅުމުގެ ފުރުސަތު ލިބިގެންދެއެވެ. އާންމުން ދޭ މައުލޫމާތުގެ އަލީގައި ކުށްކުރާ މާހައުލުތައް ދެނެގަނެ، ކުށެއް ހިނގުމުގެ ކުރިން ފިޔަވަޅު އެޅުމަށް ފުލުހުންނަށް މަގުފަހިވެގެންދާނެއެވެ.
މި ޕްރޮގްރާމުގެ ތެރެއިން އެއްކުރެވޭ މައުލޫމާތުތައް ދިރާސާކުރުމަށްފަހު، ހުޅުމާލޭގެ ސެކިއުރިޓީ އިތުރަށް ހަރުދަނާކުރުމަށް ފިޔަވަޅުތައް އަޅާނެކަމަށް ފުލުހުން ބުނެއެވެ. މިގޮތުން ހައުސިންގ ޑިވެލޮޕްމަންޓް ކޯޕަރޭޝަން ފަދަ ކަމާގުޅޭ އިދާރާތަކާ ގުޅިގެން، އާންމު ތަންތަނުގެ އަލިކަން އިތުރުކުރުމާއި މަގުތަކުގައި ސީސީޓީވީ ކެމެރާ ހަރުކުރުމުގެ މަސައްކަތް ފުޅާކުރުމަށް ވަނީ ހަމަޖެހިފައެވެ.
މީގެ އިތުރުން ވިޔަފާރިވެރިންނާ ބައްދަލުކޮށް ފިހާރަތަކުގެ ސަލާމަތީ ކަންކަން ބަލައި، ވައްކަންކުރުން ހުއްޓުވުމަށް އެޅިދާނެ ފިޔަވަޅުތަކާ ގުޅޭގޮތުން އިރުޝާދު ދެމުންދެއެވެ. މަގުމަތީގެ އެކްސިޑެންޓުތައް މަދުކުރުމަށްޓަކައި ހެލްމެޓު އެޅުމާއި ބާރު ސްޕީޑުގައި ނުދުއްވުމަށް ނަސޭހަތްތެރިވެ، މަގުމަތީގެ ގަވާއިދުތަކަށް ހޭލުންތެރިކުރުވުމުގެ މަސައްކަތްވެސް ކުރިއަށްދެއެވެ.
ކުރިއަށް އޮތް ދުވަސްތަކުގައިވެސް މެދުކެނޑުމެއްނެތި މި ހަރަކާތްތައް ކުރިއަށްގެންދިއުމަށް ފުލުހުން ވަނީ ނިންމާފައެވެ. މުޖުތަމައުގެ ހަމަޖެހުން ގާއިމުކުރުމުގައި ރައްޔިތުންގެ ފަރާތުން ލިބެމުންދާ އެއްބާރުލުން ފާހަގަކޮށް ފުލުހުން ވަނީ ޝުކުރު އަދާކޮށްފައެވެ.
ކިޔުންތެރިންގެ ހިޔާލު