އޮޑިޓަރ ޖެނެރަލްގެ އޮފީހުގެ އައު ސްޓްރެޓީޖިކް ޕްލޭން އިފްތިތާޙްކޮށްފިއެވެ.
މިއަދު ބޭއްވި ކުދި ޖަޒީރާ ޤައުމުތަކުގެ އޮޑިޓު އިދާރާތަކުގެ މަހާސިންތާ ނިންމުމުގެ ރަސްމިއްޔާތުގައި މި ޕްލޭން އިފްތިތާޙްކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
މި ސްޓްރެޓީޖިކް ޕްލޭނަކީ 2026-2029 އަށް އޮޑިޓް އޮފީހުގެ މަސައްކަތްތައް ބައްޓަންކުރާނެ ގޮތާއި ސަމާލުކަން ދޭނެ ކަންކަމުގެ ތަފްސީލީ މަޢުލޫމާތު ހިމެނޭ ޕްލޭނެކެވެ.
އޮޑިޓަރ ޖެނެރަލް ހުސައިން ނިޔާޒީ ވިދާޅުވީ، އެ ސްޓްރެޓެޖީ އެކުލަވާލާފައި ވަނީ ޒަމާނީ، ބަރޯސާވެވޭ އަދި ނަތީޖާ ހާސިލްކުރެވޭނެފަދަ ތަސައްވުރަކާއެކުގައި ކަމަށެވެ. އައު ޕްލޭންގައި އިސްކަންދީފައިވާ ކަންތައްތަކުގެ ތެރޭގައި ދަރަނި ބެލެހެއްޓުމުގެ ނިޒާމް ހަރުދަނާކުރުމާއި، ތިމާވެއްޓަށް އަންނަ ބަދަލުތައް ދެނެގަތުމާއި، އާއްމު ޕޮލިސީތައް ތަންފީޒްކުރެވޭ މިންވަރު ދެނެގަތުން ހިމެނޭކަމަށް ފާހަަކުރެއްވިއެވެ.
މީގެއިތުރުން، ފޮރެންސިކް އޮޑިޓްތަކާއި، މައުލޫމާތުގެ ނިޒާމާއި އެހެނިހެން ޚާއްސަ އޮޑިޓްތަކާއި ގުޅޭ އުއްމީދީ ވާހަކަތަކެއް އެ ޕްލޭންގައި ހިމެނޭކަމަށް އޮޑިޓަރޖެނެރަލް ވިދާޅުވިއެވެ. ހަމައެހެންމެ އޮޑިޓް އޮފީހުގެ ޤާބިލްކަން އިތުރުކުރުމަށާއި، މަސައްކަތުގައި ޓެކްނޮލިޖީގެ ބޭނުންހިފުމަށާއި، ޒަމާނީ އޮޑިޓްކުރުމުގެ ވައްޓަފާޅިތައް ބޭނުންކުރުމަށް އެ ސްޓްރެޓީޖިކް ޕްލޭންގައި ހިމަނާފައިވެއެވެ. އަދި ޤައުމީ ފެންވަރުގައި އާއި ބައިނަލްއަޤުވާމީ ފެންވަރުގައި ކަމާއި ގުޅުން ހުރި ފަރާތްތަކާއި ގުޅިގެން މަސައްކަތްކުރުމަށް ހަމަޖެހިފައިވާކަމަށް އޮޑިޓަރ ޖެނެރަލް ވިދާޅުވިއެވެ.
ކިޔުންތެރިންގެ ހިޔާލު