ސަޢޫދީީ ޢަރަބިއްޔާގެ 96 ވަނަ ޤައުމީ ދުވަހާއި ގުޅިގެން ދިވެހިރާއްޖޭގައި ހުންނަ އެ ޤައުމުގެ އެމްބަސީން އިންތިޒާމުކުރި ޚާއްސަ ޙަފްލާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުން ޝަރަފުވެރިކޮށް ދެއްވައިފި އެވެ.
މިރޭގެ ހަފްލާ އޮތީ ކުރުނބާ މޯލްޑިވްސް ގަ އެވެ. ސަޢޫދީީ ޢަރަބިއްޔާގެ 96 ވަނަ ޤައުމީ ދުވަހާއި ގުޅިގެން ބޭއްވި މި ޙަފްލާގެ ރައީސުލްޖުމްހޫރިއްޔާގެ ދެކަނބަލުން ކުރުނބާ މޯލްޑިވްސްއަށް ވަޑައިގެންނެވުމުން މަރުޙަބާ ވިދާޅުވީ ސަޢުދީއަރަބިއްޔާއިން ރާއްޖެއަށް ކަނޑައަޅުއްވާފައިވާ ސަފީރު ޔަޙްޔާ ޙަސަން އަލްޤަޙްޠާނީ އެވެ.
މިރޭގެ ހަފްލާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވާހަކަފުޅު ދައްކަވާފަ އެވެ. އެމަނިކުފާނުގެ ވާހަކަފުޅުގައި ސަޢޫދީީ ޢަރަބިއްޔާގެ 96 ވަނަ ޤައުމީ ދުވަހުގެ ތަޙުނިޔާ އެ ޤައުމުގެ ރަސްގެފާނު ސަލްމާން ބިން އަބްދުލްއަޒީޒް އަލް ސައުދު، ވަލީއަހުދު އަދި ބޮޑުވަޒީރު، ޕްރިންސް މުހައްމަދު ބިން ސަލްމާން ބިން އަބްދުލްއަޒީޒް އަލް ސައުދާއި ޝާހީ އާއިލާއާ، ސަރުކާރާއި އެ ޤައުމުގެ އަޚުވަންތަ ރައްޔިތުންނަށް ފޮނުއްވާފައިވެ އެވެ.
އަދި ދެ ޤައުމުގެ ގުޅުމުގެ މުހިންމު ކަން ފާހަގަ ކުރެއްވި އެވެ. ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގެ އިޖްތިމާޢީ، އިޤްތިޞާދީ ތަރައްޤީގައި ސަޢުދީގެ ހިއްސާ ފާހަގަކުރައްވާ ޝުކުރު އަދާކުރެއްވި އެވެ.
މިރޭގެ ޙަފްލާގައި “އަ ޕާޓްނަރޝިޕް ފޮރ ދަ ފިއުޗަރ” މި ނަމުގައި ވަނީ ޚާއްސަ ވީޑިއޯ ޕްރެޒެންޓޭޝަނެއް ދައްކާލާފަ އެވެ. އަދި ސަޢޫދީީ ޢަރަބިއްޔާގެ 96 ވަނަ ޤައުމީ ދުވަހުގެ މުނާސަބަތުގައި ކޭކު ފެޅުން އޮތެވެ.
ކިޔުންތެރިންގެ ހިޔާލު