އިސްތިއުމާރީ އިސްރާއީލުގެ ޓެރަރިސްޓު ސިފައިން ރެއިން ފެށިގެން ޣައްޒާއަށް ދެމުންގެންދާ އުދުވާނީ ހަމަލާތަކުގައި ޝަހީދުކޮށްލި މީހުންގެ އަދަދު 10 އަށް އަރައިފިއެވެ.
ޣައްޒާގެ ހޮސްޕިޓަލްތަކުން ބުނެފައިވަނީ، މި ހަމަލާތަކުގައި އިތުރު އެތައް ބަޔަކު ޒަޚަމްވެފައިވާ ކަމަށެވެ.
ރެއިންފެށިގެން ދެމުންގެންދާ ހަމަލާތަކުގައި ޣައްޒާގެ 4 އާއިލާއެއްގެ ހުރިހާ މެމްބަރުން ޝަހީދުކޮށް، އެ އާއިލާތައް ވުޖޫދުންވެސް ފޮހެލާފައިވާ ކަމަށް ޣައްޒާއިން ލިބޭ ރިޕޯޓްތައް ބުނެއެވެ.
މި ޓެރަރިސްޓު ހަމަލާތަކުގައި ޝަހީދުކޮށްލި މީހުންގެ ތެރޭގައި 3 ކުޑަކުދިންވެސް ހިމެނެއެވެ.
ޣައްޒާގެ ވެރިކަންކުރާ ގާޒާ ސިޓީގެ އައްސައުސީ އެޕާޓްމަންޓް ޓަވަރަށް ދިން ހަމަލާގައި ޝަހީދުވި އާއިލާ މެމްބަރުންގެ ތެރޭގައި ވިހަން ކައިރިވެފައި އިން މާބަނޑު އަންހެނަކުވެސް ހިމެނެއެވެ. އެ ހަމަލާގައި ދެމަފިރިންނާއި، އެ ދެމަފިރިންގެ ކުޑަ ދަރިފުޅުވެސް ޝަހީދުވިއެވެ.
ދީރުލް ބަލާހަށް ދިން ޓެރަރިސްޓު ހަމަލާއެއްގައި ދެމަފިރިޔަކު ޝަހީދުކޮށްލާފައި ވާއިރު، މީގެކުރީގެ ހަމަލާތަކުގައި އެ ދެމަފިރިންގެ ތިންކުދިންވަނީ ޝަހީދުކޮށްލާފައެވެ.
އަލް މަވާސީ ސަރަހައްދުގެ އެޕާޓްމަންޓަކަށް ދިން ޓެރަރިސްޓު ހަމަލާއެއްގައި ދެމަފިރިއަކާއި އެދެމަފިރިންގެ ކުޑަ ދަރިފުޅު ޝަހީދުކޮށްލާފައި ވެއެވެ.
ޖަބަލިއާ ރެފިއުޖީ ކޭމްޕަށްވެސް ހަމަލާދީ އެކަކު ޝަހީދުކޮށްލާފައި ވެއެވެ.
ރެއިން ފެށިގެން ޣައްޒާއިން ބާރުގަދަ ގޮވުންތަކުގެ އަޑުފަށްގަނޑު މެދުނުކެނޑޭކަމަށް ރިޕޯޓްތައް ބުނެއެވެ.
ހަމަލާތައް ހުއްޓާލުމަށް ހަމާސްއާއި އިސްރާއީލާ ދެމެދު ވެވުނު އެއްބަސްވުމަށް މިދިޔަ އަހަރުގެ އޮކްޓޫބަރު މަހުގެ 10 ވަނަ ދުވަހު އަމަލުކުރަން ފަށާފައިވާއިރު، އޭގެފަހުންވެސް އިސްތިއުމާރީ ސިފައިން ޣައްޒާއަށްދޭ ހަމަލާތައް ހުއްޓައެއް ނުލައެވެ.
އެއްބަސްވުމަށް އަމަލުކުރަން ފެށިފަހުން އެކަނިވެސް ޣައްޒާއިން މިހާތަނަށް 1،230 މީހުން ޝަހީދުކޮށްލާފައި ވާއިރު، ހަމަލާތަކުގައި ޒަޚަމްވި މީހުންގެ އަދަދު 4،076 އަށް އަރާފައި ވެއެވެ.
2023 ވަނަ އަހަރުގެ އޮކްޓޫބަރު މަހުން ފެށިގެން އިސްތިއުމާރީ ޓެރަރިސްޓުންގެ ހަމަލާތަކުގައި ޣައްޒާއިން ޝަހީދުކޮށްލި މީހުންގެ ޖުމްލަ އަދަދު މިހާރުވަނީ 73،356 އަށް އަރާފައެވެ.
ކިޔުންތެރިންގެ ހިޔާލު