ޒަޔަނިސްޓު ޓެރަރިސްޓު ސިފައިން ޣައްޒާގެ ވެރިރަށް ގާޒާ ސިޓީއަށް ރޭގައި ދިން ވަރުގަދަ އުދުވާނީ ހަމަލާތަކުގައި ޝަހީދުވި މީހުންގެ އަދަދު 6 އަށް އަރައިފިއެވެ. ޒަޚަމްވި މީހުންގެ އަދަދު 25 އަށް އަރާފައި ވެއެވެ.
ޒަޔަނިސްޓު ޓެރަރިސްޓުން ރޭގައި މިސައިލުން ހަމަލާ ދީފައިވަނީ ގާޒާ ސިޓީގެ އައް ޝާތީ ރެފިއުޖީ ކޭމްޕަށެވެ. ހަމަލާތައް އަމާޒުކޮށްފައިވަނީ ގެދޮރުގެއްލި ހާލުގައި ޖެހިފައިވާ މީހުން ދިރިއުޅޭ ޓެންޓުތަކަށާއި، އިމާރާތްތަކަށެވެ.
އިސްތިއުމާރީ ޓެރަރިސްޓުންގެ ހަމަލާތަކާ ގުޅިގެން ބޮޑު ސަރަހައްދެއްގައި އަލިފާން ރޯވިއެވެ. އެތައް ޓެންޓަކާއި، އިމާރާތެއްގައި އަލިފާން ރޯވެ އަނދާފައި ވެއެވެ.
އައް ޝާތީ ރެފިއުޖީ ކޭމްޕަށް ހަމަލާދިން ވަގުތަކީ ރޭގަނޑުގެ ދަންވަރުކަމުން ގިނަ އާއިލާތައް ތިބީ ނިދާފައެވެ. ކުއްލިއަކަށް ހަމަލާތައް ފެށުމުން އެމީހުންނަށް ސަލާމަތް ވެވޭނެ އެއްވެސް ގޮތެއް ނުވި ކަމަށް، ޣައްޒާއިން ލިބޭ ޚަބަރުތައް ބުނެއެވެ.
ޓެންޓުތައް އަނދައި، އިމާރާތްތައް ހަލާކުވުމުގެ ސަބަބުން، އެ ސަރަހައްދުގެ 150 ވަރަކަށް މީހުން މިހާރު އެއްވެސް ހިޔާވަހިކަމެއްނެތި މަގުމަތިވެފައިވާ ކަމަށް، ޣައްޒާއިން ބުނެއެވެ. އޭގެ ތެރޭގައި އެތައް ކުޑަކުދީންވެސް ހިމެނެއެވެ.
ޣައްޒާގެ އަލް ބުރައިޖް ރެފިއުޖީ ކޭމްޕަށްވެސް ރޭގައި ވައިގެ ހަމަލާދީ ތުއްތުކުއްޖަކު ޝަހީދުކޮށްލާފައި ވެއެވެ.
ރޭގައި ޣައްޒާގެ އެކި ހިސާބުތަކަށް ދެގަޑިއިރު ވަންދެން ހުއްޓާނުލާ ވައިގެ ހަމަލާތައް ދީފައިވާ ކަމަށް ޚަބަރުތައް ބުނެއެވެ.
ހަމަލާތައް ހުއްޓާލަން އެއްބަސްވުމެއް ހެދިނަމަވެސް، އެއީ ދުނިޔެއަށް އޮޅުވާލަން އެމެރިކާއާއި ޒަޔަނިސްޓު ދައުލަތުން ހިންގި ޖަރީމާއެއްކަން ވަރަށް ސާފެވެ. އެއްބަސްވުމެއް ހެދިނަމަވެސް ޓެރަރިސްޓުން ގެންދަނީ ކެނޑިނޭޅި ޣައްޒާއަށް ބޮންއަޅައި، މިސައިލުން ހަމަލާދީ ކޮންމެ ދުވަހަކު އެތައް ކުދީންނާއި އެތައް އާންމުން ޝަހީދުކުރަމުންނެވެ.
ޓެރަރިސްޓުން ޣައްޒާއަށް ދެމުންގެންދާ ހަމަލާތައް އިތުރަށް ފުޅާކޮށް، ވަރުގަދަ ކޮށްފައި ވެއެވެ. އަދި ޣައްޒާގެ ބިމުގެ އިތުރު ސަރަހައްދުތައްވެސް ގެންދަނީ ހިފަމުންނެވެ. ކުޑަކުދިންނާއި، އާއިލާތައް އެއްތަނުން އަނެއްތަނަށް ގެންދަނީ ފައްސަމުންނެވެ.
އެމެރިކާ، ޖަރުމަނު އަދި ހުޅަނގުގެ ބޮޑެތި ބާރުތަކުން ގެންދަނީ ޣައްޒާގެ ނަސްލުނައްތާލަން ބޭނުންވާ ބޮމާއި ހަތިޔާރު މެދުނުކެނޑި ފޯރުކޮށްދެމުންނެވެ. ޒަޔަނިސްޓުން ޣައްޒާގައި ހިންގާ ޖަރީމާތައް ހުއްޓުވަން އދގެ ތެރެއިން ނުވަތަ އެހެން ބަޔަކު މަސައްކަތް ކުރިޔަސް އެކަމަކަށް ހުރަސްއަޅައި ގެންދަނީ ހުއްޓުވަމުންނެވެ.
ކިޔުންތެރިންގެ ހިޔާލު