ސިޔާސީ ޕާޓީތަކުގެ ގާނޫނުގައި ބަޔާންކޮށްފައިވާ މުއްދަތުގެ ތެރޭގައި އަހަރީ އޮޑިޓް ރިޕޯޓް ހުށަނާޅާ ޕާޓީތައް އިލެކްޝަންސް ކޮމިޝަނުން ޖޫރިމަނާކޮށްފިއެވެ.
އިލެކްޝަންސް ކޮމިޝަނުން ހާމަކޮށްފައިވާ ގޮތުގައި، މިއަހަރުގެ އޮޑިޓް ރިޕޯޓް ހުށަހެޅުމަށް ދީފައިވާ ސުންގަޑިއަށް ރިޕޯޓް ހުށަހަޅާފައި ނުވާތީ ޖޫރިމަނާކޮށްފައިވަނީ އަދާލަތު ޕާޓީއާއި މޯލްޑިވްސް ނޭޝަނަލް ޕާޓީއެވެ. ދިވެހިރައްޔިތުންގެ ޑިމޮކްރެޓިކް ޕާޓީން ރިޕޯޓް ހުށަހަޅާފައިވަނީ މުއްދަތު ހަމަވި ފަހުން ޖޫން މަހުގެ 4 ވަނަ ދުވަހުއެވެ.
ސިޔާސީ ޕާޓީތަކުގެ ގާނޫނުގެ 41 ވަނަ މާއްދާގައިވާ ގޮތުން، ކޮންމެ މީލާދީ އަހަރެއް ނިމޭތާ 90 ދުވަހުގެ ތެރޭގައި އޮޑިޓް ރިޕޯޓް ހުށަހަޅަން ޖެހެއެވެ. މި އަހަރުގެ މޭ މަހުގެ 20 ވަނަ ދުވަހުގެ ނިޔަލަށް ރިޕޯޓް ހުށަހަޅާފައިވަނީ މޯލްޑިވްސް ޑިވެލޮޕްމެންޓް އެލަޔަންސް އާއި ޕީޕަލްސް ނޭޝަނަލް ކޮންގްރެސް އާއި ޖުމްހޫރީ ޕާޓީ އަދި ޕީޕަލްސް ނޭޝަނަލް ފްރޮންޓުންނެވެ.
ގާނޫނުގައި ބަޔާންކޮށްފައިވާ ގޮތުން، އޮޑިޓް ރިޕޯޓް ހުށަނާޅާ ޕާޓީތައް 50,000 ރުފިޔާއިން ޖޫރިމަނާކުރުމުގެ އިހުތިޔާރު އިލެކްޝަންސް ކޮމިޝަނަށް ލިބިގެންވެއެވެ. މި ފައިސާ ޖޫރިމަނާކުރާކަން އަންގާތާ މަސްދުވަހުގެ ތެރޭގައި ދައްކަން ޖެހޭނެއެވެ. އަދި ފައިސާ ނުދައްކައިފިނަމަ، ޖެހިގެން އަންނަ އަހަރު ދައުލަތުގެ ބަޖެޓުން ޕާޓީއަށް ދޫކުރާ ފައިސާއިން އެ އަދަދު އުނިކުރެވޭނެއެވެ.
މީގެ އިތުރުން، ޕާޓީތަކުން ހުށަހަޅާ އޮޑިޓް ރިޕޯޓުތަކާ މެދު އޮޑިޓާ ޖެނެރަލް ދެކޭގޮތް، ރިޕޯޓް ހުށަހަޅާތާ އެއް މަސްދުވަހުގެ ތެރޭގައި ރައްޔިތުންގެ މަޖިލީހަށާއި އިލެކްޝަންސް ކޮމިޝަނަށް ހުށަހަޅަން ޖެހޭނެކަމަށްވެސް ގާނޫނުގައި ބަޔާންކޮށްފައިވެއެވެ.
ކިޔުންތެރިންގެ ހިޔާލު