ތައިލެންޑަށް ދަތުރުކުރާ ފަރާތްތަކުން އެ ގައުމަށް އެތެރެވުމުގެ ކުރިން އޮންލައިންކޮށް އެރައިވަލް ކާޑު ފުރިހަމަކުރުމަށް ގައުމީ އެއާލައިން މޯލްޑިވިއަނުން އަންގައިފިއެވެ.
ތައިލެންޑަށް ދަތުރުކުރާ މީހުން އެ ގައުމަށް އެތެރެވުމުގެ ކުރިން ޑިޖިޓަލް އެރައިވަލް ކާޑު ފުރުމަށް ގައުމީ އެއާލައިން މޯލްޑިވިއަނުން އިލްތިމާސްކޮށްފިއެވެ. މޯލްޑިވިއަނުން އާންމުކޮށްފައިވާ މައުލޫމާތުގައިވާ ގޮތުން، ވައިގެ މަގުން ތައިލެންޑަށް ދަތުރުކުރާ މީހުން އެ ގައުމަށް އެތެރެވުމުގެ ތިން ދުވަހުގެ ކުރިން ޑިޖިޓަލް އެރައިވަލް ކާޑު ޕޯޓަލް މެދުވެރިކޮށް ދަތުރުގެ ތަފުސީލުތައް ރަޖިސްޓްރީ ކުރަންޖެހޭނެއެވެ.
ތައިލެންޑުގެ އިމިގްރޭޝަން އުސޫލުތަކަށް މި ބަދަލު ގެނެސްފައިވަނީ މިދިޔަ މޭ މަހުގެ ފުރަތަމަ ދުވަހުއެވެ. މި އާ ބަދަލާއެކު، މޭ މަހުގެ ފުރަތަމަ ދުވަހުން ފެށިގެން އެ ގައުމަށް ދަތުރުކުރާ ކޮންމެ މީހަކުވެސް އޮންލައިންކޮށް މި ކާޑު ފުރިހަމަކުރުމަކީ މަޖުބޫރު ކަމެކެވެ. މިއީ ދަތުރުވެރިންނަށް ފަސޭހައިން އިމިގްރޭޝަންގެ ކަންކަން ހަމަޖެއްސުމަށްޓަކައި އަމަލުކުރަން ފެށި ނިޒާމެކެވެ.
ދަތުރުވެރިން މި ކާޑު ފުރިހަމަކުރުމަށްފަހު، އެކަން ކަށަވަރުކޮށްދޭ ޑިޖިޓަލް ކޮޕީއެއް ރައްކާތެރިކޮށްފައި ބޭއްވުމަށް މޯލްޑިވިއަނުން ވަނީ އެދިފައެވެ. އަދި ތައިލެންޑަށް އެތެރެވާއިރު އިމިގްރޭޝަން ކައުންޓަރަށް މި ކޮޕީ ހުށަހެޅުމަކީ ދަތުރުވެރިންގެ ޒިންމާއެއް ކަމަށްވެސް އެ އެއާލައިނުން ބުނެފައިވެއެވެ.
ކިޔުންތެރިންގެ ހިޔާލު