ދުނިޔޭގެ އާބާދީ ދުވަހާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ދެއްވި ޚިޠާބުގައި، ރާއްޖޭގެ ޢުމުރުން ދުވަސްވީ މީހުންގެ އާބާދީ އިތުރުވަމުންދާތީ، އެ ފަރާތްތަކަށް އެހީތެރިވުމަށްޓަކައި ޒުވާނުންގެ ޞިއްޙަތަށާއި ކުރިއެރުމަށް ވުނަކުރުމަކީ ކޮންމެހެން ކުރަންޖެހޭ ކަމެއްކަމުގައި ވިދާޅުވެއްޖެއެވެ.
ސަރުކާރުން ޒުވާނުންގެ ކުރިއެރުމަށް ޚާއްޞަ ސަމާލުކަމެއް ދެމުންދާކަން ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ ދުޅަހެޔޮ ޞިއްޙަތެއްގައި ޒުވާނުން ބިނާކުރުމަކީ ދިގުދެމިގެންދާ ބަލިތަކުން އެމީހުން ސަލާމަތްކޮށްދޭނެ ކަމެއް ކަމަށެވެ. މީގެ ސަބަބުން މުސްތަޤުބަލުގައި އުފެއްދުންތެރި މަސައްކަތްތެރީންނާއި، ދުވަސްވީ މީހުންނަށް އަޅައިލާނެ މަދަދުވެރީން އުފެދިގެންދާނެކަން އެމަނިކުފާނު ފާހަގަކުރެއްވިއެވެ. ރާއްޖޭގެ އާބާދީގެ ގާތްގަނޑަކަށް 39 އިންސައްތައަކީ ޒުވާނުންކަމަށް ވާއިރު، ފެންވަރު ރަނގަޅު ތަޢުލީމާއި މާނަހުރި ވަޒީފާގެ ފުރުޞަތުތައް އެ ފަރާތްތަކަށް ހޯދައިދިނުމަކީ ސަރުކާރުން އިންތިހާއަށް އަހަންމިއްޔަތުކަންދޭ ކަމެއްކަމުގައި ވެސް ވިދާޅުވިއެވެ.
ކެއަރ އިކޮނޮމީއަށް ވުނަކުރުމުގެ މުހިންމުކަމުގެ މައްޗަށް އަލިއަޅުއްވާލައްވަމުން، އެމަނިކުފާނު ވިދާޅުވީ މީގެ ސަބަބުން ދުވަސްވީ މީހުންނަށް ބޭނުންވާ ފެންވަރު ރަނގަޅު ޞިއްޙީ ފަރުވާއާއި އިޖުތިމާޢީ އެއްބާރުލުން ކަށަވަރުކުރެވޭނެ ކަމަށެވެ. އަދި އާމްދަނީއެއް ނުލިބޭ ގޮތަށް މީހުން ބެލުމުގެ ބުރަ، ވަކީން ޚާއްޞަކޮށް އަންހެނުންނާއި އަންހެންކުދީންގެ ކިބައިން ލުއިކޮށްދެވި، އިންސާނީ ކަރާމާތް ނަގަހައްޓައިދީ، އިތުރަށް ވިލުންތެރި އަދި ފާގަތި މުޖުތަމަޢެއް ބިނާކުރެވޭނެކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ. މިއާއެކު ދެމެހެއްޓެނިވި ތަރައްޤީ ޙާޞިލުކުރެވޭނީ ޤައުމުގެ ޒުވާނުންގެ ފުރިހަމަ ޤާބިލިއްޔަތު ބޭނުންކުރުމަށް އެމީހުން ބާރުވެރިކޮށްގެންކަން އެމަނިކުފާނު ސާފުކޮށްދެއްވިއެވެ.
ދިވެހިރާއްޖެ މިއަދު އޮތީ އާބާދީގެ ނިސްބަތްތަކަށް އަންނަމުންދާ ބަދަލުތަކުގެ މުހިންމު އިންތިޤާލީ މަރުޙަލާއެއްގައިކަން ބަޔާންކުރައްވައި، މޯލްޑިވްސް 2.0 ގެ ދަށުން ޢާންމު ޚިދުމަތްތައް ޒަމާނީކޮށް، ސުމޭކު ބިނާރާއި އިޤުތިޞާދު ތަރައްޤީކުރުމުގެ މަސައްކަތްތައް ކުރިއަށްދާކަން ހާމަކުރެއްވިއެވެ. މީގެ އިތުރުން، އާބާދީގެ ތަފާސްހިސާބުތައް އަދާހަމަކުރުމުގެ މުހިންމުކަން ފާހަގަކުރައްވައި، ރަށު ފެންވަރުގައި އިދާރީ ދަފްތަރުތައް ހަރުދަނާކޮށް ހިންގުމުގެ ޚަރަދު ކުޑަކުރުމަށް ސަރުކާރުން މަސައްކަތްކުރަމުންދާކަމަށް ވިދާޅުވިއެވެ. އަދި 2030 ވަނަ އަހަރުގެ ބޯހިމެނުން ކުރިއަށްގެންދާނީ އިދާރީ ދަފްތަރުތަކާއި ބޯހިމެނުމުގެ އުސްލޫބުތައް އެކުލަވާލައިގެން ތައްޔާރުކުރާ ހައިބްރިޑް އުޞޫލަކުންކަން އެމަނިކުފާނުގެ މެސެޖުގައި އިޢުލާނުކުރެއްވިއެވެ.
ކިޔުންތެރިންގެ ހިޔާލު