މަސްތުވާތަކެތީގެ މައްސަލައެއްގައި މީގެ ތިން މަސް ކުރިން ހައްޔަރުކުރުމަށްފަހު ދޫވެފައި ހުރި މީހަކު، 3.5 ކިލޯގެ މަސްތުވާތަކެއްޗާއެކު ހުޅުމާލެއިން އަނެއްކާވެސް ހައްޔަރުކޮށްފިއެވެ.
ފުލުހުން ހިންގި އޮޕަރޭޝަނެއްގައި ހުޅުމާލެއިން ހައްޔަރުކޮށްފައިވަނީ މާލޭގެ ދަފުތަރު ނަންބަރު 071، އުމުރުން 44 އަހަރުގެ ފަތުޙު އާދަމް ޙަސަންފުޅެވެ. އޭނާ ހައްޔަރުކޮށްފައިވަނީ ގިނަ އަދަދެއްގެ މަސްތުވާތަކެތި ހިފައިގެން ޓެކްސީއެއްގައި ހުޅުމާލެއަށް ދިޔަ ކަމަށް ފުލުހުންނަށް ލިބުނު މައުލޫމާތަކާ ގުޅިގެންނެވެ. އޭނާ ޓެކްސީން ފޭބި ވަގުތު ހުއްޓުވައި ބަލައި ފާސްކުރިއިރު، އޭނާ ގެންގުޅުނު ފޮށިގަނޑެއްގެ ތެރެއިން 3.5 ކިލޯގެ މަސްތުވާތަކެތި ފެނިފައިވާ ކަމަށް ރަސްމީ އިދާރާތަކުން ބަޔާންކުރެއެވެ.
މި މައްސަލައާ ގުޅިގެން ފަތުޙު އާދަމް ޙަސަންފުޅުގެ ބަންދާމެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުން، އޭނާގެ ބަންދަށް ކޯޓުން ވަނީ 15 ދުވަހުގެ މުއްދަތެއް ދީފައެވެ. ކޯޓުގެ ބަންދު އަމުރުގައި ބަޔާންކޮށްފައިވާ ގޮތުން، އޭނާގެ ކުޑަކަމުދާ ތަކެތި ވަނީ މަސްތުވާތަކެއްޗަށް ޕޮޒިޓިވްވެފައެވެ. މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ފަތުޙު އާދަމް ޙަސަންފުޅަކީ މީގެ ކުރިންވެސް މަސްތުވާތަކެތީގެ މައްސަލަތަކުގެ ރެކޯޑު އޮންނަ ފަރާތެކެވެ. މީގެ ތިން މަސް ކުރިން، އޭޕްރީލް މަހުގެ އަށްވަނަ ދުވަހުގެ ރޭ ފުލުހުންގެ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ހިންގި އޮޕަރޭޝަނެއްގައި، ކޯޓު އަމުރެއްގެ ދަށުން މާލޭގެ ގެއެއް ބަލައި ފާސްކުރުމަށްފަހުވެސް އޭނާ ހައްޔަރުކޮށްފައިވެއެވެ. މިފަދަ ބޮޑެތި ކުށްތަކުގެ ތުހުމަތުގައި ހައްޔަރުކުރެވޭ ފަރާތްތައް މުޖުތަމައުއަށް ދޫވެފައި ތިބުމަކީ އާންމު ސަލާމަތާއި ރައްކާތެރިކަމަށް އޮތް ނުރައްކަލެއް ކަމުގައި ކަމާބެހޭ ފަރާތްތަކުން ފާހަގަކުރެއެވެ.
ކިޔުންތެރިންގެ ހިޔާލު