ހއ. ހޯރަފުށީގެ ހުޅަނގު ފަރާތު ފަރުމައްޗަށް މަރުވެފައި އޮތް 30 ފޫޓުގެ ބޮޑުމަހެއް ލެއްގުމާ ގުޅިގެން، ކަމާބެހޭ އިދާރާތައް ގުޅިގެން އެ މަސް އެއްގަމަށް ނަގައި ރައްކާތެރިކަމާއެކު ވަޅުލައިފިއެވެ.
ހޯރަފުށީ ކައުންސިލުން މައުލޫމާތު ދެއްވި ގޮތުގައި، މަރުވެފައި އޮތް މި ބޮޑުމަސް ފެނުމާ ގުޅިގެން، އެ މަސް ފަރުމަތިން ނަގައި އެއްގަމަށް ގެނައުމުގެ މަސައްކަތް ކުރިއަށް ގެންގޮސްފައިވަނީ ގިނަ މުއައްސަސާތަކެއް ގުޅިގެންނެވެ. މިގޮތުން ރަށު ކައުންސިލާއި، ދިވެހި ފުލުހުންގެ ޚިދުމަތާއި، އެމްއެންޑީއެފް ނޮދަން އޭރިއާ ކޮމާންޑްގެ އިތުރުން އެމްޓީސީސީ ހޯރަފުށީ ސައިޓްގެ ފުރިހަމަ އެހީތެރިކަން މި މަސައްކަތުގައި ލިބިފައިވާކަމަށް ކައުންސިލުން ފާހަގަކުރައްވައެވެ.
މަރުވެފައި އޮތް ބޮޑުމަހެއް ރަށުގެ ފަރުމަތީގައި އޮތުމަކީ އޭގެ ސަބަބުން ތިމާވެއްޓަށާއި އާންމު ސިއްހަތަށް ނޭދެވޭ އަސަރުތަކެއް ކޮށްފާނެ ކަމަކަށްވާތީ، ކަމާބެހޭ ފަރާތްތަކުން ވަނީ ހަލުވިކަމާއެކު ފިޔަވަޅު އަޅާފައެވެ. ފަރުމަތީގައި އޮތް މި ބޮޑުމަސް ބޮޑެތި މެޝިނަރީ ބޭނުންކޮށްގެން ގޮނޑުދޮށަށް ނެގުމަށްފަހު، ރައްކާތެރިކަމާއެކު މިހާރު ވަނީ ވަޅުލާފައެވެ.
ކިޔުންތެރިންގެ ހިޔާލު