ބްރެޒިލް ކަޓުވާލުމަށްފަހު, ނޯވޭ ފީފާ ވަރލްޑްކަޕްގެ ކްއާޓާ ފައިނަލަށް ދަތުރުކޮށްފިއެވެ. ނޯވޭ ކުއާޓާ ފައިނަލަށް ދަތުރުކުރީ ވޯލްޑުކަޕް ތާރީޚުގައި އެންމެ ކާމިޔާބު ބްރެޒިލްގެ މައްޗަށް 1-2އިން ކުރި ހޯދައިގެންނެވެ.
މި މެޗުގައި ނޯވޭގެ ދެ ލަނޑުވެސް ޖެހީ ޒުވާން ކުޅުންތެރިޔާ ހާލަންޑުއެވެ. ދެލަނޑުވެސް ޖެހީ ދެވަނަ ހާފްގައެވެ. 79 ވަނަ މިނިޓްގައި ފުރަތަމަ ގޯލް ޖެހީ އޭރިޔާ ތެރެއަށް ނެގި ހުރަސް ގެބްރިއަލް ކައިރިން ބޮލުން ގޯލުގެ ތެރެއަށް ފޮނުވާލައިގެންނެވެ. ދެވަނަ ގޯލް ޖެހީ އޭރިޔާ ބޭރުން, 20 ޔާޑުން ބޯޅަ ކޮންޓްރޯލް ކޮށްލުމަށްފަހު ތިރިތިރިން ގޯލްގެ ދުރުކަނަށް ފޮނުވާލައިގެން މެޗުގެ ފުރިހަމަ ވަގުތުން ފަހު މިނިޓްގައެވެ. މިއީ ހާލަންޑް މުބާރާތުގައި ޖެހި 7 ވަނަ ގޯލެވެ. މިއަދަދަށް މެސީ އާއި އެމްބާޕޭ ވެސް ވަނީ ލަނޑު ޖަހާފައެވެ.
ބްރެޒިލް ބަލިވީ ފުރަތަމަ ހާފްގައި ޕެނަލްޓީއެއް ލިބި ނާކާމިޔާބުވުމަށްފަހުއެވެ. އަދި ދެވަނަ ހާފްގައިވެސް ބްރެޒިލަށް ލަނޑުޖަހަން ރަނގަޅު ފުރުޞަތުތަކެއް ލިބި ވަނީ ބޭކާރުވެފައެވެ. ދެވަނަ ހާފްގައި ކުޅެން ނިކުއިން އެންޑްރިކްއަށް މުޅިން ހުސްކޮށްލާފަ ވިނީޝިއުސް ދިން ބޯޅަވެސް އޭނާ އަތުން ބޭކާރުވިއެވެ. މެޗުގައި ދެޓީމްގެ ކީޕަރުންވެސް ރަނގަޅު ސޭވްތަކެއް ކުރިއެވެ. ފުރަތަމަ ހާފްގައި ވިނީޝިއުސް ފޮނުވާލި ބާރު ބޯޅައަކާއި, ދެވަނަ ހާފްގައި ރަޔަން ފޮނުވާލި ބާރު ބޯޅައެއްވެސް ނޯވޭ ކީޕަރު މަތަކުރިއެވެ. އަދި ކަސެމީރޯ އަށް ލިބުނު ހުސް ފުރުޞަތެއްވެސް އަރިމަތިން ފޮނުވާލީ ބޭރަށެވެ.
ދެވަނަ ހާފްގެ ކުރީކޮޅު ކޯޗު އެންޗެލޮޓީ ވަނީ ނޭމާ ވެސް ކުޅެން ނެރެފައެވެ. ނަމަވެސް އިތުރު ވަގުތުގައި ޕެނަލްޓީ ކާމިޔާބުކުރުން ފިޔަވާ ތަފާތެއް ނުފެނުނެވެ.
މިއީ ނޯނޭ މުބާރާތުގެ ކްއާޓާ ފައިނަލަށް ދަތުރުކުރި ފުރަތަމަ ފަހަރެވެ. އަދި ބްރެޒިލް 1990 ވަނަ އަހަރުގެ ފަހުން ކްއާޓާ ފައިނަލަށް ނުގޮސް ކެޓި ފުރަތަމަ ފަހަރެވެ.
ކިޔުންތެރިންގެ ހިޔާލު