އިސްތިއުމާރީ ސިފައިން ޣައްޒާއަށް ދިން ޓެރަރިސްޓު ހަމަލާތަކެއްގައި ޣައްޒާއިން އިތުރު ދެމީހުން ޝަހީދު ކޮށްލައިފިއެވެ.
މި ހަމަލާގައި އިތުރު އެތައް ބަޔަކު ޒަޚަމްވި ކަމަށް ޣައްޒާގެ ހެލްތު މިނިސްޓްރީން ބުނެއެވެ.
އިސްތިއުމާރީ ސިފައިން ޓެރަރިސްޓު ވައިގެމަގުން ހަމަލާ ދީފައިވަނީ ޣައްޒާގައި ވެރިކަންކުރާ ގާޒާ ސިޓީގެ އުމަރު އަލް މުޚުތާރު މަގުގައި އުޅުނު އާންމުންގެ ގްރޫޕަކަށެވެ. އެމީހުން ތިބީ ވޯޓަރ ޑިސަލިނޭޝަން ސްޓޭޝަނެއްގެ ކައިރިއަށް ފެންބަލާ ގޮހެވެ.
މީގެއިތުރުން، ޣައްޒާގެ ދެކުނުން ޚާން ޔޫނިސްގެ ގަތަރު ކޭމްޕް ކައިރީގައި އުޅުނު އާންމުންގެ ގަޔަށް ބަޑިޖަހައި އެތައް ބަޔަކު ޒަޚަމްކޮށްލާފައި ވެއެވެ. ޚާން ޔޫނިސްގެ އަލް މަވާސީ ސަރަހައްދުގައިވެސް އާންމު މީހެއްގެ ބޮލަށް ބަޑިޖަހާފައި ވެއެވެ.
ޣައްޒާގެ ދެކުނުން ރަފަހް ސިޓީގައި ގެދޮރު ގެއްލި މަގުމަތިވެފައިވާ އާންމުން ދިރިއުޅޭ ޓެންޓުތަކަށްވެސް އިސްތިއުމާރީ ޓެރަރިސްޓުން މިއަދުވަނީ ބަޑިޖަހާފައެވެ.
ހަމަލާތައް ހުއްޓާލުމަށް އެއްބަސްވުމެއް ހެދިފައި އޮތްނަމަވެސް، އިސްތިއުމާރީ ސިފައިން ގެންދަނީ ކޮންމެ ދުވަހަކު ޣައްޒާގެ އުތުރާއި، މެދުތެރެއާއި ދެކުނުގެ ރަށްތަކުގައި އާންމުންނަށް ހަމަލާދީ އެތައް ބަޔަކު ޝަހީދުކުރަމުންނެވެ.
އަސްކަރީ ޖެޓުތަކާއި ޑްރޯން ބޭނުންކޮށްގެން ބޮންއަޅައި މިސައިލުންވެސް ހަމަލާ ދެމުންގެންދާއިރު، އެއްގަމުމަގުން ޣައްޒާއަށް އަރައިގެންއުޅޭ ޓެރަރިސްޓުން ގެންދަނީ ބޮޑުބަޑިންނާއި ބަޑިން ހަމަލާދީވެސް އެތައް ބަޔަކު ޝަހީދުކުރަމުންނެވެ.
މީގެއިތުރުން، ބުލްޑޯޒަރުތައް ވައްދައިގެން ޣައްޒާގެ އެކި ހިސާބުތަކުން އެތައް ގެއަކާއި އާންމުން ދިރިއުޅޭ އެތައް އިމާރާތެއްވެސް އިސްތިއުމާރީ ސިފައިން ކޮންމެ ދުވަހަކު ގެންދަނީ ހަލާކުކޮށް ސުންނާފަތި ކުރަމުންނެވެ.
ކިޔުންތެރިންގެ ހިޔާލު