ސިޔާސީ އެއްވުންތަކުގައި ކުރީގެ ރައީސުންނަށް ސެކިއުރިޓީ ނުދޭގޮތަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން ނިންމި ނިންމުމާ ގުޅިގެން އިދިކޮޅު އެމްޑީޕީން ކަންބޮޑުވުން ފާޅުކޮށްފިއެވެ.
ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން ބޭއްވި ސިއްރު ބައްދަލުވުމެއްގައި، މެންބަރުންގެ އަޣުލަބިއްޔަތުން ވަނީ ކުރީގެ ރައީސުން ބައިވެރިވެވަޑައިގަންނަވާ ސިޔާސީ އެއްވުންތަކާއި މުޒާހަރާތަކުގައި އެމްއެންޑީއެފުން ސެކިއުރިޓީ ފޯރުކޮށްދޭން ނުޖެހޭ ގޮތަށް އުސޫލު އިސްލާހުކުރަން ނިންމާފައެވެ. މި ނިންމުމާ ގުޅިގެން ނޫސްވެރިންނަށް މައުލޫމާތު ދެމުން އެމްޑީޕީން ބުނެފައިވަނީ، މިއީ ސިޔާސީ މަޤުސަދެއްގައި ނިންމާފައިވާ ނިންމުމެއް ކަމަށެވެ. އަދި ދައުލަތުން ފޯރުކޮށްދޭންޖެހޭ ރައްކާތެރިކަން ކުޑަވާގޮތަށް އުސޫލުތައް ބަދަލުކުރުމަކީ އެ ޕާޓީން ގަބޫލުކުރާނެ ކަމެއް ނޫންކަމަށްވެސް ފާހަގަކޮށްފައިވެއެވެ.
މި މައްސަލައިގައި ވާހަކަދައްކަވަމުން އެމްޑީޕީގެ ޗެއަރޕަރސަން އަދި ކުރީގެ ރައީސް މުޙައްމަދު ނަޝީދު ވިދާޅުވީ، ސަލާމަތީ ބާރުތަކުން އެންމެ ބޮޑަށް ސަމާލުކަންދީގެން ސެކިއުރިޓީ ބަލަހައްޓަންޖެހޭ ތަންތަނަކީ ސިޔާސީ އެއްވުންތައް ކަމަށެވެ. އެފަދަ ހަލަބޮލި މާޙައުލުތަކުގައި ކުރީގެ ރައީސުންނަށް ދޭ ސަލާމަތީ ރައްކާތެރިކަން ކަނޑާލުމަކީ އެ ބޭފުޅުންގެ ފުރާނައަށް ނުރައްކާވެދާނެ ފަދަ ކަމެއްކަމަށް އެމްޑީޕީން ދެކޭކަމަށް އެމަނިކުފާނު ވިދާޅުވިއެވެ.
ބޭރު ޤައުމުތަކުގެ ތާރީޚަށް އަލިއަޅުއްވާލައްވަމުން ރައީސް ނަޝީދު ފާހަގަކުރެއްވި ގޮތުގައި، ސިޔާސީ އިސް ބޭފުޅުންނަށް އަމާޒުކޮށް ދީފައިވާ ގިނަ ޙަމަލާތަކަކީ އެފަދަ އެއްވުންތަކާއި މުޒާހަރާތަކުގެ ތެރެއިން ދީފައިވާ ޙަމަލާތަކެވެ. އެހެންކަމުން، ބައިނަލްއަޤުވާމީ މައިދާނުން ފެންނަން އޮތް މިފަދަ ޙަޤީޤަތްތަކަށް ބަލާއިރު، ސިޔާސީ ހަރަކާތްތަކުގައި ސެކިއުރިޓީ ނުދޭން ނިންމުމަކީ ނުހަނު ކަންބޮޑުވާ ކަމެއްކަމަށް އެ ޕާޓީން ވަނީ ހާމަކޮށްފައެވެ.
ކިޔުންތެރިންގެ ހިޔާލު