ކުރިއަށް އޮތް ސްކޫލް ޗުއްޓީއާ ދިމާކޮށް ގައުމީ އެއާލައިން މޯލްޑިވިއަންއިން އެތެރޭގެ އުދުހުންތަކަށް ބޮޑު އިތުރުވުމެއް ގެންނަން ނިންމައިފިއެވެ.
މި އަހަރުގެ އެކެޑެމިކް ކަލަންޑަރުގައިވާ ގޮތުން ޖުލައި މަހުގެ ނުވަވަނަ ދުވަހު ފުރަތަމަ ޓާމްގެ ޓެސްޓުތައް ނިމުމަށްފަހު، އޮގަސްޓު މަހުގެ ދެވަނަ ދުވަހު އަލުން ސްކޫލްތައް ހުޅުވޭނެއެވެ. މި ދުވަސްވަރާ ދިމާކޮށް ދަތުރުފަތުރުކުރާ މީހުންނަށް ލުއިފަސޭހަކޮށްދިނުމުގެ ގޮތުން، ޖުލައި މަހުގެ ދިހަވަނަ ދުވަހުން ފެށިގެން އޮގަސްޓު މަހުގެ ހަތަރުވަނަ ދުވަހުގެ ނިޔަލަށް ދަތުރުތައް އިތުރުކުރުމަށް މޯލްޑިވިއަންއިން ވަނީ ނިންމާފައެވެ.
މޯލްޑިވިއަންއިން ހާމަކޮށްފައިވާ ގޮތުގައި މި މުއްދަތުގެ ތެރޭގައި އެތެރޭގެ އުދުހުންތަކަށް ތިންސަތޭކަ ވިއްސަށްވުރެ ގިނަ ފްލައިޓް އިތުރުކުރެވޭނެއެވެ. މިއާއެކު އަށާރަހާސް ސީޓުގެ ޖާގަ އިތުރުވެގެންދާނެއެވެ. ޗުއްޓީ ތެރޭގައި ޖުމްލަ ދެހާހަށްވުރެ ގިނަ އެތެރޭގެ އުދުހުންތައް ބާއްވާއިރު، މިއީ ގާތްގަނޑަކަށް އެއްލައްކަ ދިހަހާސް ސީޓުގެ ކެޕޭސިޓީއެކެވެ.
ގިނަ އަދަދެއްގެ މީހުންނަށް އެއްފަހަރާ ދަތުރުކުރުމުގެ ފުރުސަތު ފަހިކޮށްދިނުމަށްޓަކައި، ބައެއް މަންޒިލްތަކަށް އެއާބަސް އޭ320 މަރުކާގެ ބޯޓުތައް ބޭނުންކުރުމަށް ވަނީ ހަމަޖެހިފައެވެ. މި ބޯޓުތައް ބޭނުންކޮށްގެން ދަތުރުކުރުމަށް ހަމަޖެހިފައިވަނީ ގަން އިންޓަނޭޝަނަލް އެއާޕޯޓަށާއި ހަނިމާދޫ އިންޓަނޭޝަނަލް އެއާޕޯޓަށެވެ.
ޗުއްޓީ ދުވަސްތަކާއި އީދު ބަންދު ފަދަ މުނާސަބަތުތަކުގައި ދަތުރުކުރާ މީހުންގެ އަދަދު ވަރަށް ބޮޑަށް އިތުރުވެއެވެ. ނިމިދިޔަ އީދު ބަންދުގައިވެސް މޯލްޑިވިއަންއިން ވަނީ އާންމުކޮށް ތާވަލުކޮށްފައިވާ ދަތުރުތަކަށްވުރެ އިތުރަށް ދުއިސައްތައަށްވުރެ ގިނަ ފްލައިޓް އޮޕަރޭޓްކޮށްފައެވެ.
ކިޔުންތެރިންގެ ހިޔާލު